ღ بشروه إني أبرحل ღ

الجزء الثاني عشر :


عامر: معقوله يافيصل صرت قاسي للهدرجه..وانت حتى العصفور ماتقوى على ذبحه
فيصل والظاهر انه ماتخلص من شحنات الغضب: عامر...اقولك تضرب امي ..وتبغاني احب راسها
عامر: مدري وشقولك..بس مهما سوت مفروض انك ماتمد ايدك..يافيصل خاف الله هذي بنيه يتيمه ومسكينه ومقطوعه من شجره مالها الا الله ثم انت ..
فيصل: يااخي فقدت اعصابي..حط نفسك مكاني وشتسوي لاصارت زوجتك تضرب امك؟
عامر طالع فيصل بنظرات غامضه: كنت احسنت الاختيار من البدايه..واخليها هي اللي تخطبلي بنفسها ..ومو اخطب لنفسي وانجرف ورى شعور ممكن يكون كاذب..ومااصدق احساس يمكن يكون مو صادق
فيصل كان يظن ان عامر بيهديه ويهون له من اللي صار بس الظاهر انه حصل العكس ...طلع من عامر وهو معصب اكثر ...رد للبيت وهو حاط بباله انه يطق مها اكثر واكثر ...يمكن تبرد حرته ...
وقبل ينزل من سيارته وهو معزم انه يكمل مشوار الطق اللي بداه قبل ساعه طرت عليه جمله قالتها مها :
"اخاف تكرهني...كثر ماحبيتني اخاف تكرهني"- كانت مها دايما خايفه من هالشي ..."معقوله اكرهك يامها "
رجع وركب سيارته وماعرف وين يروح .....اهم شي يبتعد قد مايقدر.."ماصدق مديت ايدي عليها...ضربتها...انا اضرب حبيبة قلبي مها..شتمتها ..قلتلها كلمات تهد الجبل لوهو واقف بشموخه..مها حبيبتي رقيقه..وحساسه.. اقولها ياعقيم وانا اللي عمري ماجرحت احد ...ليه يانفسي ؟ليه؟هانت عليك مها يافيصل
رجع البيت الساعه10 ..مافي احد بالصاله..دخل غرفته..
فيصل يناديها: مها ....مها
لقاها قاعده بين السرير والطوفه حاطه ايدينها على رجولها ودافنه راسها بينهم...وتواسيها دموعها ..كالعاده
شافها فيصل بهالوضع الجريح الكسير..وحس بمدى تفاهته وقساوته لما مد ايده عليها ...
قعد فيصل مقابلها وحط ايده على ايدها....رفعت راسها..وشافته بنظراتها الجريحه ...
وقبل يقدم أي اعتذارات..قالت مها: ممكن تشيل ايدك عني
فيصل: مها..
مها : لو سمحت شيل ايدك عني
شال فيصل ايده وقعد على السرير وراها لانه ماقدر يحط عينه بعينها وهربا من نظراتها اللي كانت تعور قلبه
فيصل:مها ..سامحيني
مها: ياكثر ماقلتها
فيصل: كنت ...
مها: كنت تقولي ..انك بتصيرلي اكثر من اخ ...تذكر والا نسيت؟
فيصل: مها اللي حصل كله كان ..كنت ..
مها: الاخ مايطق اخته ..ظلم
فيصل بإندفاع: شلون ظلم فهميني؟..انا هالمره شفتك بعيني محد قالي
مها: انا ماراح اقدم لك أي مبررات ...الله ياخذ حقي منك ومن امك
رد فيصل وقعد قدامهاوحط عينه بعينها: لو شفتيني اضرب امك وشتسوين؟
مها: امي...الله يرحمها
وقعدت مها تبجي بصوت عالي...
فيصل وهو يمسك ايدها بقوه ويجرها بعنف ويجبرها توقف معاه ويرفع صوته: ها...علميني شكنتي تسوين؟
تحاول مها انها تفك ايدها من قبضته القويه ويرتفع نص كمها: فيصل خلاص انا مافيني حيل..هدني
مااهتم فيصل لتوسلاتها وركز عينه على ايدها...ايد مها البيضه الناعمه ..كانت مورمه وتعطي الوان..احمر.واخضر ..وبنفسجي ..ووسط كل هالذهول سمعها تقول: فيصل انا ماطقيت امك ..هي طلبت مني امشط شعرها ولما شافتك صرخت واتهمتني اني اطقها ...قالتلي عندي حساسيه من المشوط..انا ماصدقتها بس قلت اجاريها عشانك..لانها حزة رجوعك من الدوام وانا مابي تصير مشاكل...فيصل الله يخليك هد ايدي والله انت تعورني ..
قالت كلامها وهي تبجي وتصيح ...وتتألم
فيصل: مها...كل هالرضات اللي بإيدك مني انا؟
مها:......
فيصل بخوف: في مثل هالالوان بمكان ثاني من جسمك؟
مها وهي تبجي وتنزل راسها : كل جسمي
هد ايدها وهو ...ندمان...متحسف..."عقب شنو؟"
اخذها على السرير جنبه ...تنهد وسكت شوي ..قام من مكانه ..راح لكبته وجاب شي معاه...
نزع دشداشته وعقبها نزع بلوزته الداخليه ...قعد على ركبه جدام مها اللي كانت قاعده على السرير ..مد ايده لها وهو يبكي وهو بقمة احزانه مد ايده لها وقال: هذا اغلظ عقال عندي كان لابوي ..انا قدامك اضربيني عذبيني ..ابي مثل الزراق اللي بإيدك يطلع فيني...ابي الالم اللي سببته لك يصير فيني...
عطاها العقال ...وعطاها ظهره بعد
مها منصدمه :.....مافيني حيل...
فيصل: ارجوك يامها...عذبيني مثل ماعذبتك
مها حذفت العقال بعيد...وفيصل قدامها مثل الذليل...قاعد على ركبه ومعطيها ظهره ..يبكي مثل ماكانت تبكي بصمت وحرقه.....وبإندفاع شديد وبدون تفكيرضمته من ورى ظهره: احــــــــــــــــــبك يا‎فـــيصل
كانت مها متمسكه فيه حيل وبكل ما اوتت من قوه ..تبجي وهي تقول : فيصل تكفى لاتبجي جدامي مره ثانيه انت رمز للقوه بناظري...فيصل انت اكبر من جذي...لاتذل نفسك لاحد...
فيصل من ناحيته كان ماسك ايدينها بقوه وهو يحاول يوقف سيل الدموع اللي تذرفها عيونه ...
:::::::::::::::::::::::::::::::::::
تمر الايام ثقيله على كل العوائل ...ساره كانت دايما تزور جراح وتحاول قد ماتقدر ان تعود المياه لمجاريها مع ابوها...واهل جراح حاولوا قد مايقدرون انهم يخففون الحكم على جراح ..وبعد شغل الواسطات الغي عنه حكم الابعاد عن البلاد وبصعوبه....فرحت ساره لهالخبر وكذلك جراح ..واقسمت له ساره انها ماراح تزوج غيره ....بالنسبه لمها وعلاقتها مع خالتها تدهورت اكثر من اول وزادت حدة النزاع بينهم ..مها ماكانت ترد على خالتها ولاتكلمها عقب السالفه اللي صارت بينهم قبل اسابيع..لكن ام فيصل عقرب رمل ماتخلي احد لحاله....
فيصل: مها تعالي ابيك بسالفه ...
مها: هلا فيصل في شي بعد
فيصل: أي في....
مها وهي تقعد: تكلم فيصل شفيك سكت؟
فيصل: الحرمه مالها الا بيتها وزوجها
مها: وأحد قال غير هالكلام ؟
فيصل:انا شايف ان ..دراستك مالها معنى..يعني ..اتركي الجامعه
مها بذهول: ليش؟
فيصل:لاسباب كثيره
مها: عطني سبب واحد مقنع ..عشان انا اقتنع فيه
فيصل: موشرط تقتنعين اهم شي اني مقتنع
مها: اسفه..دراستي لايمكن اتركها
فيصل بعصبيه: تعصين امري يامها؟
مها: مااعصيك ..بس انت تطلب المستحيل
فيصل: عالعموم الكلام الحين ماينفع ..انا سبحت اوراقك من الجامعه ..خصوصا انك كثيرة الغياب يعني ساعدني هالشي ..انت وشلك بالجامعه؟
مها وهي مصدومه: ليش يافيصل ؟موهذا اللي اتفقنا عليه انا كان نفسي ادرس واشتغل واساعدك ؟ انت تعاقبني بطريقه دنيئه ..
فيصل: وشقصدك؟ اني اعاقبك..ليه انتي مسويه شي يستحق العقاب؟
مها بنبره حزينه والدموع جمدت بعيونها: فيصل...ليش تزوجتني؟
فيصل: هذا سؤال؟ وليه يتزوج أي رجال؟
مها: لأنه يبي عيال
فيصل بضيق: زين اللي فهمتيها
مها: تزوج علي
فيصل انصدم لما فجرت مها بوجهه هالقنبله اللي ماتوقعها: مها...انت وشقاعد تقولين؟
مها: فيصل انت قدمت لي معروف انا لايمكن انساه بحياتي ..ومو معقوله مااردلك هالمعروف ..
انا ادري انا سالفة العيال هذي مضيقه خلقك وملعوزتك ..وادري بعد انك شايل همي وتخاف تصدمنياذا قررت انك تزوج علي...فيصل زواجك بيريحك من اشيا واجد ..اولها :علاقتك مع امك يمكن تحسن اذا هي خطبتلك..ثانيا: يمكن الله يرزقك بالعيال اللي انحرمت منهم معاي ..و..
ماقدرت مها تكمل كلامها ..لان مثل هالموضوع صعب تطرحه الزوجه على زوجها
فيصل بعد صمت قصير: مها .انتي تدرين اني احبك واني لازلت احبك والدليل اني متمسك فيك وراح اتمسك فيك لاخر لحظه بعمري...مها انتي كنتي بالنسبه لي حلم صعب تطوله ايديني لكن الحمدلله الله سهل اموري ..انت تدرين اني مااحس بالراحه الا معاك ومااحس بالدفا والحنان والحب الا بجنبك ..بس مثلك عارف ان الرجال من اكبر احلام حياته ان يشوف عياله بجنبه...انا سألت الدكتور عن حالتك وقلتله عن السفر للخارج عشان العلاج ..تدرين انه ماأيد الفكره...انا اسف يامها بس...
مها: خلاص لاتكمل..انا عارفه بكل شي...روح بشر امك
ويقوم فيصل من عندها ويروح لأمه ..الفكره هذي كانت براسه من زمان بس كان خايف من ردة فعل مها
فيصل: يمه ...انتي دايم تحنين علي تزوج.تزوج صح والا انا غلطان؟
ام فيصل: هات من الاخر شعندك؟
فيصل: انا قررت اتزوج
ام فيصل: لاوالله..الف الف مبروك وهالمره شنو قررت تاخذ بعد ؟
فيصل: اللي تختارينها انتي انا موافق اخذها
ام فيصل هدت اللي بيدها وهي مو مصدقه: تكلم جد يافيصل ..
فيصل: أي يمه اتكلم جد
ام فيصل وهي تبتسم: وتطلق مها؟
فيصل: لالالا ليه اطلقها؟
ام فيصل: وشلك بالثنتين تجمعهم عقايب على قلبك؟
فيصل: انا راضي يمه..بس انتي شوفيلي عروسه
ام فيصل: والله لازوجك ازين بنات الفريج..واسويلك عرس ماصار ولا استوى
:::::::::::::::::::::::::::::::::::::
عامر: مااصدق...فيصل اللي كان يموت على التراب اللي تمشي عليه مها يتزوج عليها؟؟!!
فيصل: شسوي؟ قلة الحيله ياخوي
عامر: بس هذي مها اللي تحملت الهوايل عشانها
فيصل: الظروف اقوى مني ومنها
عامر: وشهي الظروف اللي تخليك تزوج عليها؟
فيصل: ماتجيب عيال ...يعني تبغاني اقعد كذا بدون عيال ولاخلف ؟
عامر: اوووه...ماعليه يافيصل ..بس ليه ماجربت تعالجها ؟
فيصل: بيني وبينك: مالها علاج هنا..
عامر: طيب وبالخارج؟
فيصل: الكتور قال بلندن ...بس انت ادرى بالحال
عامر: يعني ممكن تعالج؟
فيصل: أي بس مو هنا..بلندن وانت تدري شتبي لندن؟
عامر: وانت قلتلها؟
فيصل: لا قلتلها ان مالك علاج
عامر: معقوله؟ فيصل حرام عليك ...حطمتها
فيصل: ياعمي روح ...هي متحطمه من زمان
عامر: صرت انت والزمن عليها
فيصل: يااخي هذي ماتحس ...متعوده على العذاب ..ولو انها مو متعوده ..ليه طلبت مني اتزوج عليها
عامر: هذي يسمونها تضحيه ...يافيصل احس انك متغير عليها
فيصل بعصبيه: وانت شدراك؟ ها ؟ احد شكالك الحال؟
عامر: يحقلك ترفع صوتك علي وتعاملني مثل البزران...مدام هالقلب اللي فيك تحجر مااشره عليك
ويقوم عنه عامر لانه زهق من كلام فيصل ...
:::::::::::::::::::::::::::::::::::::::::::::::::: :::::::
ام فيصل خطبت سلوى لفيصل...اول شي عارض فيصل لكن مع بعض الاقناع كل شي يصير ....
وحددوا العرس بعد ثلاث شهور..كانت من اقسى الشهور اللي مرت فيها مها ....
قبل العرس بليله فيصل نايم على السرير وجنبه مها قاعده:
مها: فيصل...
فيصل: هلا مها
مها: باجر العرس..
فيصل: يعني ماتدرين؟
مها: ادري بس....
فيصل يقعد جنبها ويطالعها: وشعندك مها؟
مها: باجر تروح لغيري..وانا اتفرج ومابيدي شي
فيصل يتنهد: مو انتي اللي طلبتي مني؟
مها: ندمت
فيصل: لاتندمين..لانك حتى لو ماطلبتي..كنت ناوي اتزوج
مها : للهدرجه هنت عليك؟
فيصل: ماهنتي علي..والله العالم شكثر حبك بقلبي ..بس مثلك عارف
مها: بتعيش بالشقه اللي فوق؟
فيصل: أي..امي طلعت المستأجرين واثثت الشقه...اول مره احس انها كريمه
مها: وانا...وبن اروح؟
فيصل: مثل ماانتي ماراح تغير حياتك بشي
بمها: والجامعه؟
فيصل: الموضوع منتهي خلاص ...الجامعه راحت ومالها رجعه
مها: والكويت؟
فيصل استغرب من كلامها: انشالله لما تتحسن الظروف بوديكي تزورين الكويت
مها ودمعه حاره نزلت من عينها: واهلي؟
زاد استغراب فيصل: اهلك الله يرحمهم
مها : وفيصل اللي كنت احبه؟
فيصل يبتسم: لازال يحبك بس ظروفه القاسيه جبرته على اشيا مايحبها
مها: لاتخلى عني ...
فيصل: مستحيل ياحياتي مستحيل اتخلى عنك...انتي نعمه من الله ويكون نكران مني اذا جحدتك ..مها حبيبتي ارتاحي الحين ..
::::::::::::::::::::

اليوم العرس ....ام فيصل منعت مها انها تروح العرس ...ومها كانت رافضه بالاساس انها تروح بس ماحبت تبين لخالتها عشان ماتعاندها ...كانت قاعده على سريرها وكالعاده : حاطه ايدينها على رجولها ودافنه راسها بينهم وهي تبجي...في هاللحظه..في هاللحظه بس تذكرت ساره ...وتذكرتها لما تقول: يارب مايوافق خالج تزوجين فيصل "...بجت مها وهي تقول: ياليت ابواب السما كانت مفتوحه واستجاب الله دعائج ياساره
طرت عليها سالفة خالها مع ساره..وقررت تتصل عليه..."الجهاز مغلق او خارج منطقة التغطيه" ..استغربت واتصلت على بيت خالها..."الرقم المطلوب غير موجود بالخدمه"....شالسالفه...واخيرا اتصلت على بيت ام ساره:
ام ساره: الوو
مها: السلام عليكم
ام ساره: وعليكم السلام والرحمه..منو بغيتي؟
مها: ساره موجوده ؟
ام ساره: منو اقولها؟
مها:....
ام ساره:الوووو
مها بتردد: قوليلها..مها
ام ساره : لحظه شوي
مانطرت مها واجد وسمعت صوت ساره جنه من اخر الدنيا ..
ساره: مها...انتي معاي على الخط والا سكرتيه
مها: هلا ساره...شلونج؟
ساره: مااصدق مها واخيرا تنازلتي واتصلتي علي
مها: سامحيني ياساره والله ظروف ..علميني شخبارج؟
ساره: الحمدلله اموري كلها ماشيه..وابشرج رديت للجامعه
مها: مبروك...وانا...فنشت من الجامعه
ساره: افا!!!!؟ليش؟
مها: مثل ماقلتلج ....ظروف...الا اقول ساره شخبار خالي معاج للحين معاملته خايسه ؟
ساره: كل شي تغير يامها مابي ازعلج بس الاخبار مو زينه
مها: عادي قولي ترى انا تعودت على الاخبار اللي موزينه
ساره: صارتلي مشاكل واجد مع خالج...بس الحين هو مسجون بقضية مخدرات ..وتطلقت منه ..و..
ماكملت ساره جملتها الا وانقطع الاتصال...
رجعت مها لحالة الاكتئاب لكن مع تغيير بسيط وهو ان جروحها زادت عقب اللي سمعته من ساره..لانها كانت تنوي ترجع الكويت...بس للاسف ترجع لمنو؟
عقب سيل من الدموع وبعد صيحات مجروحه ...عطشت مها وقامت تشرب ماي كانت الساعه وحده ..
وفي المطبخ وعقب ماشربت الماي سمعت صوت الباب ينفتح كان ودها تطير لغرفتها لانها كانت تظن ان ام فيصل رجعت..ومها كانت تجنبها عشان المشاكل ماتزيد ...لكن القهر اكبر من شوفة ام فيصل والقدر حب انه يخليها تشوف شي ماتوقعته...شي كانت تظن انه بيقضي اول ليله بالفندق...
فيصل يدخل وبإيده عروسته اللي كانت حلوه مانظلمها بس مستحيل تجي عند جمال مها ...
اول ماشافته مها حست بخنجر يقطع صدرها ويمزق قلبها...وشنو اكبرجرح للمره من انها تشوف زوجها وبإيده حرمه ثانيه....
سمرت مها بمكانها وهي تشوف الاثنين والابتسامات شاقه حلوقهم شق...نزلت دمعه منها وهي اللي كانت تظن ان دموعها جفت ...نزلت دمعه ثانيه وهي اللي كانت معاهده نفسها انها ماتصير ضعيفه جدام فيصل
فيصل بإرتباك: مها...انتي مانمتي للحين؟ " سؤال غبي" <ليش يدعي الحب واحد مثله؟>

احبك كثر ماتنبت على خد الثرى اشعاري....كثر ماالشمس تمطر نور وكثر الحزن في عيني
احبك لين صار الحب ثوبي وقوتي وداري....واحبك لين مل الصبر وعيا لا يواسيني
وهبتك للاسف روحي وعمري واجمل ازهاري...وزرعتك والسبب ضعف جروحن في بساتيني
ورغم حبي واخلاصي وعشقي الصادق العاري...رحلتي وصارت الغربه خناجر في شراييني
كرهت الامس والصدفه واقدامي واقداري....وكل اللي يجمع في يوم مابينك ومابيني
وصرت اركض ابي ادفن في عين الشمس اصراري....وكل اللي بقى منك وكل اللي بقى فيني
جمعت الحب في كلمه هديتك عذر لأعذاري....جمعتي لي الجفا بكلمه وفي كلمه جمعتيني
تلحفت الوجع لاجلك وصرتي دمي الجاري....تبعتك لو امل كاذب يضحكني ويبكيني
نويت وكانت القصه بدا والحزن مشواري....كأن جروح خلق الله غدت عقبك عناويني
رحلت وكانت الغربه وظل هناك تذكاري....وحلم اني بعد كم عام اشوفك او تشوفيني
مضيت وصورتك نجمه يداعب ضيها افكاري....واصد وصورتك فعيني ودمعه فوق خديني
مظاهر هالجفا والكره كانت اخر ادواري....تناسى مانسى قلبي ولو انك نسيتيني
وصيتي تذكريني بخير اذا ماجابوا الطاري....واذا مامات حب الكون قصيدة حب غنيني
يااجمل من هنا الماضي فمان الحافظ الباري....ترى مابه في هالدنيا سوى موتي ينسيني
الم هم وفرح اصفر وهذي اخر اخباري....وامانه ان كان باقي جرم اخذيه ولاتزيديني
وهذا اخر احساس القصيد ونبض انهاري....واذا قد هو بدى تقصير ..فليتك لو تعذريني

وبعد اسبوع من زواج سلوى من فيصل رجعوا من مصر ..وهذا الاسبوع هديه من ام فيصل للمعاريس ..
ام فيصل: الحمدلله على السلامه ياوليدي...عساكم استانستم؟
فيصل وهو يقلب ناظريه: الله يسلمك يمه ...الحمدلله استانسنا والبركه فيك
ام فيصل: وانتي ياسلوى علميني وشلون السفره؟
سلوى : كان ناقصنا وجودك ياخالتي
فيصل: اقول يمه....وين مها؟
ام فيصل تغير لون وجهها وجنها ماتوقعت هالسؤال: مشغوله..
فيصل: وشهو شغلها؟
ام فيصل: قلتلها تنظف السطح ..السطح يافيصل صارله 12سنه ماتنظف
فيصل: يمه ليه كذا؟ مها ماهي بخدامه
ام فيصل: وانت ماتبغاها تساعد امك؟
مارد فيصل عليها..وراح للسطح فوق...لقاها بالسطح ...في احدى الزوايا تنظف الوصخ اللي فيها ..
فيصل: ليه بس؟ ليه يامها؟
التفتت مها عليه وردت كملت شغلها...قرب فيصل عندها ومسك المكنسه اللي كانت بإيدها وحذفها بعيد وهو يقول: هذا مو شغلك يامها انتي مو خادمه ..
طالعته مها بنظرات بارده وبهدوء ...راحت واخذت المكنسه من على الارض وكملت شغلها ..
فيصل: مها ردي علي
مها وبدون أي انفعال: خالتي قالتلي اذا بتعيشين لازم تشتغلين
فيصل بضيق: طيب والخادمه وش وظيفتها
مها: انا الخادمه
فيصل: لاتقولي عن نفسك كذا تراكي تجرحيني
مها خانقتها العبره: وانا...ماتهمك جروحي؟
قرب فيصل منها ومسك ايدها وقرب من اذنها وهمس لها: اشتقتلك ...والله العظيم اشتقتلك
صوت غريب يجي من وراهم "سلوى": الله الله عالحب يافيصل..تاركني تحت لحالي وطاير لحبيبة القلب
التفت فيصل عليها: انتي وشجايبك لحد هنا؟
سلوى وهي تطالع مها: اشتقتلك
فيصل: سلوى روحي لغرفتك الحين اجيك
سلوى بإصرار: مااروح الا ورجلي على رجلك
فيصل يرفع صوته ولازال ماسك ايد مها: اقولك روحي غرفتك
مها نزلت ايدها من فيصل وهي تقول: ارجوك روحلها...خلاص روح ..روح ..مااتحمل اشوفها
سلوى: اسم الله عليكي يالرقيقه...كلش عاد انا متحملتك ...مالت عليكي
فيصل بعصبيه : سلوى وشقاعد اقولك انا؟
سلوى: قلتلك مااروح من هنا الا وانت معي
فيصل: طيب هذا انا جيت معك
وقبل يروح قال لمها: انتظريني بعد شوي لا تنامين جايبلك معي هديه
ماردت مها عليه وكملت شغلها المتعب ..وقبل ينزل فيصل قالها: مها اتركي اللي بيدك وروحي ارتاحي
مها وهي تحاول قد ماتقدر انها ماتحط عينها بعينه : مااقدر..لازم اخلص اللي بإيدي
فيصل: بس..
وتقاطعه سلوى وهي تسحبه من ايده: خلصنا ياشيخ
وفي اليوم الثاني :
فيصل: يمه انا بروح اجيب خادمه ...وانا اللي بدفع معاشها
ام فيصل وهي معصبه: والله العظيم ان جبت خادمه ,,,لاتلوم الا نفسك
فيصل: لا يمه انا مااسمح ان مها تصير خادمه.. هذي زوجتي وماتهون علي
ام فيصل: والله ياحبيبي هي مااعترضت ولاشكت ..ليه خايف على راحتها؟
فيصل: يمه..مها هذا طبعها كتومه...وماتحب تشكي..يمه نجمه كانت خادمتنا من سنين طويله ليه خليتيها تروح؟
ام فيصل: والله انا ماخليتها تروح...هي اللي ملت وتبغى تسافر لأهلها
فيصل: الحين وشلون؟ مها مستحيل اخليها تشتغل
ام فيصل : انا عندي حل...روح نادلها وخلنا نسألها
فيصل: يمه وشهالحل ؟ اكيد انها بتخاف منك وبترضى
ام فيصل: ليه تخاف مني وحش انا؟ رح نادها وشوف
راح فيصل لمها وحب يكلمها بروحهم ....لقاها بالمطبخ تغسل مواعين الغدا:
فيصل: مها ممكن تهدين اللي معاك شوي وتجين غرفتنا بغيت اكلمك بموضوع ؟
مها: ماقدر فيصل والله الشغل واجد
فيصل: دقيقه ماتأثر
مها: وين سلوى؟
فيصل: راحت لأهلها تسلم عليهم
مها: وليش مايجون اهلها يسلمون ؟ الباب عند الباب
فيصل: هذا مو موضوعنا
مها غسلت ايدها وسبقته للغرفه ...
فيصل: وشفيك؟
مها: مافيني شي
فيصل: متغيره حيل
مها وكانت تتحاشى تلاقى عيونهم: مثلك تماما
فيصل: انا؟ انا ماتغيرت
مها: المهم شبغيت مني؟
فيصل: ابغى اللي يبغاه أي زوج من زوجته
مها: ماعندي
فيصل: وشو اللي ماعندك ؟
مها: العيال
فيصل: ومن جاب طاري العيال؟
مها: انت
فيصل: مها حبيبتي ممكن اعرف ليه ماتحطين عينك في عيني وتكلميني؟
مها: مااقدر
فيصل: انتي زعلانه؟ >سؤال ثاني سخيف وغبي<
مها ابتسمت ابتسامه باهته: ازعل؟ على شنو
فيصل: احس انك مو طبيعيه....ابغى اعرف شصار بالضبط في غيابي ؟
مها: ولاشي
فيصل: الا كل شي
مها:.....
فيصل: ممكن اعرف ليه رضيتي تشتغلين شغل الخادمه؟
مها بإنفعال: تبي تعرف ليش؟
فيصل: أي
مها: ويهمك تعرف ليش؟
فيصل: اكيد يهمني
مها: لاني وبكل صراحه ا..
في هاللحظه تدخل عليهم سلوى والشرر يتطاير من عيونها ...وهي في قمة غضبها
فيصل وهو يوقف : سلوى انتي شلون تدخلين بهالطريقه؟ ماتعرفين تضربين الباب قبل تدخلين ؟
سلوى: لا والله قاعد مع ست الحسن والجمال ولاكأنك سويت شي
فيصل بعصبيه: وشسويت؟
سلوى: حرام بريء مايدري وشسوى؟
فيصل: خلصينا وشعندك؟
سلوى: انا ماخذني زوجه مش خادمه
فيصل: ومن قال غير هالحكي؟
سلوى: خالتي تقول انك قايلها ..اني اتقاسم الشغل مع هالخايسه هذي
فيصل : ارجوك سلوى احترمي نفسك واطلعي بره
سلوى: انا رايحه بس حسابي معك بعدين
تطلع سلوى ويرد فيصل يقعد مع مها:
فيصل: مها انا اسف واعتذر عن الكلام اللي قالته سلوى ماعليكي منها
مها: عادي سمعت هالكلمه واجد .
صدت مها للصوب الثاني وحست انها ماتقدر تمسك نفسها اكثر ومن كثر توترها كانت تعض اظافرها وهذي العاده كانت معاها من وهي صغيره اذا حست بالتعب ..وفيصل ماهان عليه يشوف مها جذي :
فيصل: مها
مها: فيصل ارجوك ...روحلها ...روح للي تركتني عشانها..حتى احترام لك ماعندها
فيصل عصب من كلامها: اولا انا ماتركتك عشانها لاتنسين ان...
تقاطعه مها: بس انا اللي قلتلك تزوج صح؟؟؟؟!!خلاص حفظت هالاسطوانه ومليت منها..ماجنك انت اللي قلتلي انك بتزوج من قبل اقولك....فيصل ترى مليت من هالسالفه ومليت منك ومن نفسي ومن حياتي وكرهت كل شي حولي...انت يافيصل اناني بعز ماكنت محتاجتك ..تركتني ..
فيصل يطالعها بنظرة احتقار: الحين انا صرت اناني ؟
مها: أي...انت اناني ومغرور وشايف نفسك....شتبي الحين؟
فيصل: لاتكلميني بهالطريقه .... ترى انا احذرك!
مها: اطلع برى ...مابي اشوف وجهك
فيصل يصرخ على مها: انتي قاعده بيتي واذا في احد ينطرد منه فهو انتي مو انا...صدقت سلوى: خايسه .لا ولسانك طويل بعد
ويطلع فيصل ...حست مها بإرتياح لان هالمره ماانزلت دمعتها ..
:::::::::::::::::::
ام فيصل: اكرهها ياام سعود...ولاادري ويش اسوي عشان ادمرها واحطمها
ام سعود: كافي يادرعا خلاص ...البنت كافيها اللي فيها حرام عليكي خلاص ..
ام فيصل: انا ماارتاح الا لما ازيحها عن طريقي نهائيا
ام سعود: ابعرف وش سوتلك هي؟
ام فيصل: ذنبها كبير ياسويده "ام سعود"
ام سعود: طيب وشذنبها؟
ام فيصل: اكبر ذنوبها ان فيصل في يوم من الايام كان يحبها...وخذاها غصب عني
ام سعود: مااقول الا الله يعينها...الله يعينها
ام فيصل: وانا مااقول غير اكرمينا بسكوتك
::::::::::::::::::::::

سلوى: فيصل لا تنسى جيبلي وجبه شكن فيليه وانت راد من الدوام
كانت سلوى تكلم فيصل بالتلفون ...ولما خلصت شافت مها توها طالعه من المطبخ...
سلوى: وع شهالريحه الخايسه اللي هفت علي اعوذ بالله ماتعرفين تسبحين انتي؟
مها: الحمدلله والشكر...ناس فاضيه مالها غير التعليقات السخيفه
سلوى معصبه: انا السخيفه والا انتي...اسكتي اسكتي لا اطلع فضايحك
مها: كلن يرى الناس بعين طبعه ..
سلوى: أي طبع....والله محد راعي الطبايع الشينه غيرك
وفي هذي الاثناء تدخل ام فيصل الشريره:
ام فيصل: شبلاكن؟ صوتكن واصل اخر الدنيا
سلوى وهي تدعي البكاء: شفتيها ياخالتي... والله اني اترجاها:مها الله يخليكي نظفي غرفتي اناتعبانه اليوم
ام فيصل: وليه ترجينها وتذلين عمرك لها؟ غصبن عليها تروح مو طيب منها
مها: خالتي ...
تقاطعها ام فيصل بعصبيه: تخلخلت حنوكك انشالله يالله طيعي عمتك سلوى وروحي نظفي غرفتها ..بكل المنظفات
كانت سلوى ورى خالتها تطالع مها وتضحك ببرود ...
مها بقلبها"عسى المنظفات تنظف راسج انتي وهالهبله اللي وراج..مالت عليكم" : حاضر ياام فيصل
ولما مشت مها خطوتين :
ام فيصل: تعالي ..تعالي ...وشذي ام فيصل بعد؟
مها بصوت عالي: والله ماعرفنالج لي قلنا خالتي قلتي تخلخلت حنوجج ولي قلنا عمتي قلتي عمت عينج..يعني شتبين اقولج؟
ام فيصل: لاتقولين ولاتكلمين انا اللي بجيك الحين واعلمك الشغل
وتركض مها وتصعد الدرج وتركض وراها ام فيصل: تعالي ياقليلة الحيا ياللي ماتستحين ..خليه يجي فيصل والله لاقوله على كل فضايحك واخليه يضربك زي ذيك المره
مها من ورى الباب : مايقدر يطقني خلاص هو حلفلي انه مايطقني مره ثانيه...واسمعي بعد هالمره مراح اسكت اللي يطقني بطقه ولاني راده على اكبر راس
ام فيصل وهي تضرب على مها باب الحمام بقوه: هين يالخادمه العاصيه..بنشوف منو اللي بينطق؟
ظلت مها بالحمام ربع ساعه..ولما تأكدت ان ام فيصل نزلت تحت ..طلعت من حمام شقة سلوى اللي كانت متغبيه فيه خوفا من ام فيصل ....مها لما طلعت من الحمام كانت تعدل زرارات دراعتها وماكانت تشوف جدامها ...دعمته ...ورفعت عينها عليه...هذي اول مره تحط عينها بعينه من تزوج...
فيصل بتعب: مها وشسالفتك بعد؟
مها ولا كأن صار شي: أي سالفه بعد؟
فيصل: امي معصبه عليك
مها تضحك
فيصل اول مره يشوفها تضحك من صارت السالفه اللي ضربها فيها: مها ياحياتي ضحكينا معاك
مها: اضحك عليك...امك من متى كانت راضيه علي عشان تعصب علي ؟
فيصل وهو يبتسم: طيب تحمليها عشاني..
مها: موبس عشانك عشان انا اعيش بعد
فيصل: طيب ممكن تصيرين مطيعه ولو مره وحده عشاني؟
مها: على حسب الطلب
يمسكها فيصل من ايدها : ابيك تراضين امي
مها تسحب ايدها: مستحييييييييل
فيصل: واذا قلتلك عشاني؟
مها: هم بعد مستحيل
فيصل: طيب ليه؟
مها:لانها بكل بساطه راح تطقني
فيصل: ماتقدر تضربك وانا موجود
مها:.........
فيصل: يالله مها ارجوك بس هالمره
مها: بس هالمره
وينزل فيصل تحت ومعاه مها :
ام فيصل: شرفت ام اللسان الطويل
مها: اسفه
ام فيصل: انا ماتمشي علي اعتذاراتك التافهه هذي
سلوى تدخل بالموضوع: يافيصل انت ماشفتها وشلون تكلم امك...عن جد كانت وقحه
فيصل بإنزعاج: سلوى رجاء انتي مالك خص بالموضوع لاتتدخلين
ام فيصل: وليه ماتبغاها تكلم؟ سلوى ماغلطت ..قالت الحق
فيصل: طيب..يمه سامحي مها عشان خاطري
فيصل وهو يطالع مها ..وكأنه يترجاها عشان تكلم..
مها: سامحيني ياخالتي واوعدج اني مااعيدها
ام فيصل: وليكي عين تعيدينها مره ثانيه ؟
فيصل: حبي راسها يامها ...وخلصينا من هالسالفه التافهه
ام فيصل: لاتحب راسي ولالي فيها حاجه ....خلها تحب راس حرمتك سلوى
فيصل: سلوى وشعليها؟
ام فيصل: هي غلطت بحق سلوى
مها ماتحملت انها تنحط بمثل هالموقف السخيف وقررت انها ترجع غرفتها وبالطقاق بالثنتين عنهم مارضوا
لحقها فيصل لان الليله كانت ليلتها ...
:::::::::::::::::::
سلوى: شفتي ياخالتي راحلها وخلاني...طول عمره يحبها ولاراح يكرهها
ام فيصل: ماعليكي منها ...اهم شي انك تضبطين عمرك وتجيبين هذاك الولد اللي ينسيه حتى نفسه
سلوى: ظنك تغير معاملته لها لمااحمل انشالله ؟
ام فيصل: ومااكون درعا ان ماتغير عليها
سلوى: شفتي شلون عصت كلامنا ومانظفت الشقه ؟
ام فيصل: يجي يوم ياسلوى وفيصل هو اللي يخليها تنظفها مو احنا اللي نطلب منها
سلوى : الله يسمع منك ....
:::::::
مها: مابي اتكلم معاك ولاكلمه...انت بس تبي تذلني
فيصل: ممكن اعرف ليه تغيرت نظرتك لي؟
مها: ماتغيرت نظرتي لك الا عقب ماتغيرت نظرتك انت لي
فيصل: انا....انا لازلت احبك
مها: ماعاد يفيد يافيصل خلاص....على قولتهم انا انتهيت....تدمرت....تحطمت.. وكلمات الحب هذي ماعادت تنفع معاي ...
*اليوم من صفحة حياتي أبمسحك...هديت صرحك ثم طاحت ركونك
ولابي عيوني لو تصورت تلمحك...اعلنت موتك وانسجن لي كفونك
وان جيت تطلب ترتجيني اسامحك...بهديك طعنه من بقايا طعونك*
فيصل: مها هالكلام كبير على وحده صغيره مثلك
مها: انا ماعدت صغيره...شفت من الدنيا مايكفيني ويشيب راسي
فيصل: طيب...قولي وش اللي يريح بالك وانا اسويه لك ...
مها: فيصل....انا ...ابيك....تطلقني!!!!؟؟؟؟!!!
:::::::::::::::::::::::::::::::::
::::::::::::::::::::::::::::
فيصل تغيرت معالم وجهه من الحنيه الى العصبيه : اطلقك؟ من وين جتك فكرة الطلاق؟؟؟؟
مها تبكي: خلاص.. انا مابيك.. وماعدت احبك.. صرت اكرهك..مليت من حياتي معاك ومع امك وزوجتك ..فيصل انت قهرتني وصدمتني ..
فيصل يصرخ: خلاص اسكتي لاتكلمين اكثر من كذا ...انتي اللي جبتي لنفسك القهر والصدمات...ليه يامها تحمليني ذنوبك وخطاياك ..واذا انتي كرهتيني مره فأنا اكرهك الف مليون مره
ويطلع فيصل عنها ...مها كانت توقع ان فيصل يحبها ومهما سوالها يظل يحبها ..اهي قالت كلامها هذا ظناً منها انه بيقربها من فيصل اكثر ....لكنها انصدمت بالحقيقه المره: فيصل يكرهني؟؟؟؟؟
ولما طلع فيصل منها لقا امه وسلوى يسولفون بالصاله:
فيصل: سلوى قومي خلينا نطلع نتمشى...زهقان من البيت
ام فيصل: اكيد مطفشتك شينة الحلايا
فيصل: يالله ياسلوى انا انتظرك بالسياره
سلوى: دقايق بس اجيب عباتي ....
وطلعوا يتمشون ...اما ام فيصل دخلت على مها ..
ام فيصل: ممكن اعرف شفيه فيصل طلع من عندك متضايق؟
مها بضيقة خلق: وليش ما سألتيه ؟
ام فيصل: ياويلي على اقص لسانك الطويل ...انتي متى بتعقلين ؟
مها: الحين شبغيتي؟
وطلعت ام فيصل من عند مها وهي في قمة غضبها وحلفت انها ماتخليها بحالها ....
::::::::::::::::
وبعد مرور شهرين من زواج فيصل وكان فيصل ينام عند مها يومين وعند سلوى يومين..وعلاقة مع مها سطحيه حيييييييل:
فيصل وسلوى بالسياره..رادين من المستوصف:
فيصل: عاد مااوصيك على نفسك...لاتعبين عمرك ..الزم ماعليك راحتك
سلوى: أي راحه الله يخليك ؟ اذا امك مو راضيه تجيب خادمه
فيصل: أي والله مشكله...امي مو بس رافضه الا حالفه
سلوى: الصراحه ماعندها سالفه ...في بيت الحين مافيه خادمه؟
فيصل: بس سلوى عيب عليكي..مهما كان هذي رغبتها ولازم نحترمها
سلوى: طيب منو يغسل ملابسنا ويكويهم؟ وينظف الشقه؟ ويسوي شغل البيت؟
فيصل: مافيه غيرها... اذا مانفعت الحين متى بتنفع؟
سلوى بمكر: انت تقصد.... مها ؟
فيصل: مها....مسكينه مها شغل البيت كله على راسها ..ماتلاحظين انها ضعفت؟
سلوى: لا والله وانا مو مسكينه؟ خلها تضعف احسن ..بروحها دبه ...بس اسمع انت اللي تقولها انا اذا قلتلها ماترد علي دايم تحقرني
فيصل يضحك: يحليلها مها تعرف تحقر
سلوى: إي اضحك شعليك مو انت اللي تنحقر
فيصل: ماتدرين ؟؟؟
وصلوا البيت ...
فيصل : مها ....مها ..
مها: نعم ؟
فيصل: تعالي عندي بسولف معك
قربت مها منه شوي: بغيت شي؟
فيصل: طيب اقعدي ليه واقفه على راسي؟
مها وهي تقعد: يالله قعدت قول شعندك؟
سلوى: هيه انتي تكلمين اصغر عيالك..هذا زوجك تكلمي معه عدل
مها طالعتها من فوق لي تحت وكالعاده ماردت عليها
فيصل: سلوى حبيبتي روحي انتي غرفتك ..وتحملي على عمرك..
راحت سلوى وتحرسها نظرات فيصل وهي تركب على الدرج
مها: فيصل ؟
فيصل: هلا هلا مها ...
مها: ممكن اعرف ليش ناديتني؟ العاده ماتسأل علي لما تدخل البيت دايم تنادي سلوى
فيصل وهو يطالع مها: سلوى حامل
مها: لا مبروك وانت حضرتك جاي تبشرني ؟
فيصل: انا بغيت خدمه منك
مها: خير؟
فيصل: الخير بوجهك ...بس انا بغيت ..انا ابيك تنسين المشاكل اللي بينك وبين سلوى ترى انتو خوات و..
تقاطعه مها: انا ماعندي خوات
فيصل: طيب اعتبريها اختك
مها: مابي
فيصل بنفاذ صبر: هذا مو موضوعنا...انا بغيت انك تشوفي طلباتها واحتياجاتها..بغيتك تساعديها
مها: اهاا ..قول بمعنى اصح: اخدمها
فيصل: لا يابنت الحلال ...انا قصدي ساعديها
مها: فيصل بغيتك بموضوع
فيصل: إي تفضلي قولي وش موضوعك وانا كلي اذان صاغيه؟
مها: مااحب جو البيت
فيصل: هذا موضوعك...طبيعي اذا ماتحبين جو البيت بطلي الدرايش او..
تقاطعه مها: مو هذا موضوعي انا قصدي مابي اكلمك هني مالي خلق على زوجتك الحين تلقاها تسمع لنا
فيصل: طيب قومي البسي عباتك
وفي هاللحظه تطلعله سلوى: فيـــــــــــــــــــــــــــــــصل
فيصل: بسم الله الرحمن الرحيم انتي منين طلعتي؟
سلوى: وين بتروح وتخليني؟
مها: مو قلتلك انها تصنت علينا
فيصل: ماني متأخر ..
سلوى: طيب وين بتروح مع هالنسره
مها: انا بروح البس عباتي
فيصل: وانا استناكي بالسياره .....سلوى حبيبتي دقايق بس وراجعين
:::::::::::::::::::::::::::::

الجزء الثالث عشر :

في السياره:
فيصل: ها يامها وين بغيتي نروح؟ صارلك دهر حابسه نفسك
مها: مو مهم بس أي مكان هادي يبعدنا عن الناس
فيصل: يعني بالضبط وين؟
مها وهي تفكر: عادي نروح البحر؟
فيصل: الله خووووووش مكان.....وليه مو عادي؟ ...عادي ونص بعد
وفي البحر كانت مها قاعده وبجنبها فيصل...وطبعا سلوى ازعجتهم بالاتصالات ..
فيصل: ياسلوى دوختيني خلاص قلتلك شوي وراجعين
فيصل: طيب ..وشو؟؟؟ فراوله؟؟؟اذا لقيت بجيبلك ..خلاص مع السلامه
ولما خلص فيصل مكالمته شاف الانزعاج على وجه مها: وهذا الجوال واغلقناه ...ها وش موضوعك ؟
مها: مافي موضوع ...بس حبيت اقعد معاك
فيصل كان وده يعصب عليها..بس حن لها وسكت: أي صح احنا من زمان ماقعدنا مع بعض واذا قعدنا كله هواش وعوار راس
مها كانت سرحانه بالبحر والظاهر انها مالاحظت كلامه : فيصل...
فيصل: ياعيون فيصل
مها: انت...تكرهني؟
فيصل: ومن قال هالكلام؟
مها وهي تحط عينها بعينه: انت قلت ....قلت انك تكرهني الف مليون مره ..في احد يكره هالكثر؟
فيصل: ههههههههههه ...طيب وانا ممكن اسألك سؤال ؟
مها:......
فيصل: انتي قلتي انك تكرهيني صح ؟
مها: انا كنت متضايقه وماكنت ادري شقول
فيصل: وانا كنت معصب من كلامك وماكنت ادري وشقول
مها: يعني انت ماتكرهني؟
فيصل: لا ياحياتي انا حبي لك كبر البحر
مها: ومدام انك تحبني ليش ماتطلقني؟
فيصل: ردينا على هالكلام الفاضي واللي ماله معنى..واللي يحب زوجته ليه يطلقها؟
مها: لاني مو مرتاحه معاك
فيصل بإنكسار: ليه يامها...انا عمري قصرت عليك بشي؟
مها:مدري ...بس احس ان وجودي ماله أي معنى بينكم...فيصل انت مو ملزوم فيني ..انا لي اهل ولازم ارجعلهم
فيصل: وين تروحين؟ مو انتي قلتيلي ان خالك باع بيته
مها: اروح عن جدتي وجدي...هم المسئولين عني
فيصل: ياحبيبتي انا مستحيل اتخلى عنك ...خلي عنك الكلام الفاضي لا ارميك بالبحر الحين ويالله قومي خلينا نروح البيت الجو بارد...
مها: قول انك متلهف عليها
فيصل: الا قولي متلهف عليك...الليله ليلتك ياقمر
::::::::::::
عامر بحزن وضيقة نفس: السلام عليكم
فيصل: هلا ومرحبا وعليكم السلام….وشهالزياره المفاجئه؟
عامر: كيف حالك؟
فيصل: بخير ولله الحمد …هذي الساعه المباركه اللي جيتنا فيها
عامر: ساعتك ابرك..
فيصل: عامر….وشفيك ياخوي منت على بعضك ؟
عامر: لالا مافيني شي
فيصل: وشلون ما فيك شي وانت الهم راكبك من راسك لي ساسك
عامر:…….
فيصل: عامر…انت تعبان؟
عامر: إي
فيصل: افاااا…وش اللي متعبك؟
عامر: قلبي يافيصل يعورني حيل
فيصل: ههههههههه اكيد انك تحب
عامر : اي حب واي خرابيط…يافيصل انا تعبان وجيت اشكيلك مو تمصخر علي
فيصل: ماتمصخرنا ياابو الشباب…قول وش اللي مكدر خاطرك
عامر: اخوي حسين…
فيصل: الله يرحمه … وشفيه؟
عامر: قصدي زوجته….امي وابوي يقولون لازم تزوجها…
فيصل: واشمعنا انت ؟
عامر: انت تدري اخواني كلهم متزوجين…ومابقى غيري من قرادة حظي..
فيصل: وليه مايخلونها تشوف نصيبها مع غيرك ؟
عامر: حرمة اخوي حسين …عندها بنت منه اللي هي سمر..والوالد مايبغاها تربى بحضن واحد ثاني غير عمامها…ودبسوني انا فيها
فيصل: طيب…وانت وشقلت؟
عامر: انا….انا مالي راي صرت مثل البنت اللي زوجوها اهلها غصبن عليها
فيصل: يعني وافقت؟
عامر: ابوي ويطلبني…وشتبغاني اقوله؟…اقوله لا…اكيد ابوافق
فيصل: اشهدنك رجال ونشمي بعد...اللي سويته عين الصواب ياعامر
عامر: ومن قالك اني مرتاح؟ ..فيصل انا مااقدر اخذ حرمة اخوي
فيصل: وليه ماتاخذها؟
عامر: مدري؟ احس اني كل مااشوفها تطلع بوجهي صورة اخوي...اتخيل حسين وهو قاعد جنبها ويسولف ويضحك معاها....لالامستحيل اخذ مكان اخوي حسين
فيصل: ياابن الحلال ..حسين مات والله يرحمه والحي ابقى من الميت...وسمر بنت اخوك صارلها سنه عايشه بعيد عنكم ..ماتخاف عليها تعيش سنين ثانيه وهي ماتعرفكم ؟
عامر: وانا!! وشذنبي؟
فيصل: مالك ذنب...بس هذي الدنيا ولازم تضحي فيها
عامر:.......
فيصل: مدام انها رغبة الوالد ملزوم انك تنفذها....
عامر يرجع البيت حزنان ومهموم ...هو كان يبي يتزوج سميره بنت خالته وقال لأمه هالكلام من قبل يموت حسين وامه كانت موافقه ...لكن الظاهر ان حبه اللي ماانولد ...مات ...لان لا سميره ولاغيرها كان يعرف باللي بقلب عامر....
يدخل عامر بيتهم ..ويلقى سعيد(25سنه) اخوه كالعاده قاعد يطالع التلفزيون وسمراخته(16سنه)تكلم التلفون:
عامر: سمر...يالله سكري التلفون... من طلعت وانتي تكلمين
سمرتكلم التلفون: لحظه فجر شوي.......خير عامر وشتبغى ؟
عامر: من تكلمين؟
سمر: صديقتي ..ليه السؤال؟
عامر: ومنهي صديقتك؟
سمر: تحقيق اهو ...صديقتي وخلاص
عامر: لاخلصتي سوالف وخرابيط تعالي غرفتي ابيك ..
سمر: طيب ..خلني اخلص مكالمتي الحين
وفي غرفة عامر:
عامر: ممكن اعرف الحين منهي فجر هذي اللي توك طايحه فيها؟
سمر وهي تقعد على السرير: عامر وشفيك انت؟ صديقه جديده شفيها يعني ترى مو اول مره اتعرف على بنات غير ؟؟؟
عامر: مدري؟ بس انا مو مرتاحلها...كلامها بالتلفون لما تسأل عنك يغثني
سمر: انت شفتها عشان تحكم عليها؟
عامر: ماعلينا ...وشلونك مع الدراسه ؟
سمر: بسم الله...تونا بادين هذا ثاني اسبوع
عامر: أي بس هذي 2 ثنوي يسمونها الحفره...شدي حيلك ترى انتي بالموت نجحتي السنه اللي طافت
سمر: الحين معطلني عن اشغالي ومكالماتي المهمه وتقولي ادرسي عدل...ادري بدرس والا تبغاني انتظرك
عامر: اقول سمر...اطلعي وسكري الباب وراك...انتي مو كفو اللي ينصحك ...لكن تحملي تسقطين
سمر:ودي اعرف ليه شايل همي؟
عامر: لان انتي وحده مدلعه وماعندك احد يوقفك عند حدك ...عرفتي الحين؟
سمربنبرة مهدده: طيب ياعامر الحين انا صرت مدلعه ومتمرده ..
عامر: بلا عوار راس...ويلا تقلعي من غير مطرود
وتطلع سمر من غرفته وهي تحلطم ....اما عامر حط راسه على المخده وقعد يفكر باللي صار معاه
::::::::::::::::::::::::::::::::::::::
جراح: ساره....وينج يالظالمه اسبوع كامل مازرتيني...ليش كل هالقطاعه؟
ساره: شسوي؟ والله لهيت مع الدراسه
جراح: شدعوه عاد؟...الدراسه توها تبدي...ماامداج لهيتي
ساره:المهم...انت شلونج؟
جراح: انا...الحمدلله بخير
ساره: جراح شفيك؟ احس انك مو مرتاح
جراح: واللي يكون بنفس هالمكان تبين يرتاح؟
ساره: الله يعينك ...جراح انا كل يوم ضميري يأنبني وانا ادري انك شايل بخاطرك علي لاني السبب في مصيرك هذ1ودخولك للسجن
جراح: لاتقولين جذي...انا _مستعد اذبح نفسي عشانج ...واذبح الناس كلهم بس عشانج ..انتي تدرين شكثر معزتج عندي...ولولا غلاتج ماصار اللي صار
ساره : انا الحين لازم امشي عندي محاضره بعد نص ساعه ويادوب الحق عليها..دير بالك على عمرك
جراح: ساره.....لا تأخرين علي مره ثانيه...ترى والله اموت
ساره تبتسم: انشالله عدوينك....واوعدك مااتأخر عليك..كل ماشفت عندي وقت فراغ بجيك ..
::::::::::::::::::::::::
ام فيصل: هيه انتي ..اكلم من انا؟
مها: هلا خالتي ..والله ماسمعتك
ام فيصل : وبعدين معك على طول سرحانه ...وشعندك ؟
سلوى: وشعندها بعد؟ اكيد تفكر بماضيها الاسود
مها تطالع سلوى بنظرات احتقار ..
سلوى: وشفيكي تطالعيني كذا ياعل عيونك للبط
مها: انا اقوم غرفتي احسن من مجابل وجهج ياسلوو
ام فيصل وهي تحذف مها بالنعل: امشي ياطويلة اللسان...تعرفين تعايرين عمتك سلوى...يالله تقلعي لغرفتك
ولما راحت مها لغرفتها :
سلوى: خالتي الحين فيصل بيوصل ...ومافي عشا..انا تعبانه وماسويت
ام فيصل: وليه ماسوت طويلة اللسان والا فالحه ترادد بس؟
سلوى: تصدقين ياخالتي انها طول اليوم تسبني وتعايرني وانا مااقدر ارد عليها اخاف تضربني مع بطني ويصير في الجنين شي لاسمح الله ...انا اقولها ليه تسوين فيني كذا؟ عشان خالتي مش هنا توحدين فيني و..
ام فيصل: كملي وشقالت بعد طويلة اللسان؟
سلوى: لالالا خالتي اعفيني مااقدر اقول
ام فيصل: لا قولي انتي خايفه منها ؟
سلوى: انا مو خايفه منها بس خايفه على مشاعرك تنجرح ياخالتي
ام فيصل: هي قايله كلام عني؟
سلوى: وأي كلام؟....الله يسامحك يامها هذا كلام تقولينه عن خالتي...خالتي الحرمه الطيبه ..تقولين عنها كذا
ام فيصل بنفاذ صبر: سلوى...تكلمي ...وشقالت؟
سلوى: انا بقولك وامري لله.....بس كلمتها كبيره ياخالتي ومااقدر اقولها
ام فيصل: يابنت الحلال تكلمي انطقي ...
سلوى: تقول انك ...انك..انك ساحره ..وتروحين للمشعوذين وانك ساحره فيصل ومغيرته عليها ..وتقول بعد انك كريهه ومحد يحبك من الجيران ومجنونه بعد..وانك...انك منتي بصاحيه
ام فيصل جنت جنونها وصارت عيونها حمر من الغضب: انتي متأكده ياسلوى
سلوى: إي ياخالتي...بس لاتاخذين على كلامها...هذي توها جاهل وماتدري وشتقول ..
ام فيصل : انا اوريكي فيها ..
تروح ام فيصل لغرفة مها...بينما سلوى ترقص من الفرح ...
ام فيصل تطق الباب بقوه على مها: افتحي الباب ..
مها: خير خالتي في شي؟
ام فيصل: اللحين انا ياطويلة اللسان صرت ساحره..ومانيب صاحيه...انتي وبعدين معك يابنت الشوارع؟
مها وهي تفتح الباب: شهالكلام خالتي ؟
ام فيصل وهي تمسك مها مع رقبتها : انتي ماينفع معك غير الضرب...امشي معي
مها وهي تحاول تفك ايد خالتها: خالتي والله انتي تعوريني ..شيلي ايدج عني..انا والله ماقلت عنج شي
ام فيصل وهي ترمي مها على الارض بقوه : مها...انا اكرهك من كل قلبي...وعشان ابعدك عن طريقي وطريق ولدي ..انا مستعده اروح للسحارين والدجالين ...واصير ماني بصاحيه بس عشان ابعدك
وتترك ام فيصل مها تجمع بقايا جروحها وتنثر مابقى من دموعها ...الحياه قاسيه معاها وفرصتها مع الفرحه ضايعه ....فيصل..اهملها ..
وبعد ساعتين كانت تسمعه يضحك مع زوجته وامه..وهي حتى ماسأل عنها ..ولادرى بحزنها الكبير
::::::::::::::::::::::::

الجزء الرابع عشر :

سمر: يمه اليوم فجر صديقتي بتزورني..
ام سلمان: حياها الله يابنيتي ...البيت بيتها
سمر: إي بس سعيد يمه
ام سلمان: شفيه سعيد بعد؟
سمر: خليه يطلع...او يروح عند زوجته
ام سلمان: مااقدر اطرده ...لاتنسين ان هذا بيته مثل ماهو بيتك
سمر: انا ماقلتلك اطرديه...انا قلت صرفيه...يمه والله صديقتي انحرجت منه...المره اللي طافت يوم تجيني..كان قاعد بالصاله واول ماشافها قعد يحقق معها: شسمك؟ وبنت من؟ومنو اخوانك؟ وجايه مع منو؟
فضحني يمه..صرت انحرج لما اعزمها مره ثانيه
ام سلمان : خلاص انا بروح اكلمه اللحين والله يهديه ..
سمر: الله يخليكي لي يااحلى ام بالدنيا ..
وبعد نص ساعه توصل فجر صديقة سمر.....فجر هذي امها اجنبيه وطلقها ابو فجر من كان عمر فجر سنه وتزوج وحده ثانيه كانت زوجته الثانيه حنونه مع فجر وتحبها وكانت متدينه ودايم تنصح فجر لكنها ماتقدر تسيطر عليها خصوصا ان ابوفجر على طول مسافر لظروف شغله ومخلي مسئولية العيال كلهم على راسها
فجر كانت متمرده ,,في ظاهره جديده غزت العالم الاسلامي وعلى وجه الخصوص " الخليج العربي" وهي ظاهرة" الصبيك" والعياذ بالله ..ومعنى هذي الظاهره ان البنت تشبه بالرجال وتقلدهم ...هذي الظاهره كانت مسيطره على فجر ..شعرها كان بوي..وكانت تحط عطر رجالي..وكانت تمشي مشيه مو طبيعيه..والامر من هذا كله انها كانت تشرب زقاير..فجر كانت تحاول تقرب من سمر من زمان لان سمر كانت من احلى بنات المدرسه والبنات عليها نمل الكل يبيها تمشي معاه حتى المدرسات انهبلوا عليها بس سمر ماكانت تعطي فجر وجه...وهذا الشي هو اللي دفع فجر انها تمسك فيها اكثر..اما سمر عقب ماشافت من فجر كل هالحب والتمسك قررت انها تحن عليها وتصدق عليها بكم كلمه ...وكان هذا الحكي اخر السنه اللي طافت...
سمر: خلينا من الذكريات اللحين ...انا ادري اني كنت قاسيه معك ..بس والله ماعرفت قدرك الا اللحين
فجر: قلتلك من زمان جربيني مراح تخسرين شي ..
سمر: المهم كلميني عن مغامراتك مع اصدقائك ...وشسويتي معهم اخر مره؟
فجر: صدقيني ياحياتي انا معاهم مثلي معك...اصدقاء عاديين
سمر: وتكلمينهم بالجوال؟
فجر: لا اكلمهم بالهاتف العمومي...انتي وشرايك؟ اكيد اكلمهم بالجوال
سمر: حظك....مو اخواني اول مافتحت معهم هالسيره عصبوا علي وهاوشوني
فجر: انتي ماعندك جوال؟
سمر: ومنوين ياحسره؟
فجر: ولايهمك...انا بجيبلك الجوال واعتبريه هديه مني لك
سمر وهي منحرجه: لا فجوره لاتفهميني غلط...انا بشتري بس مو الحين انشالله بعد مااخلص الثانويه
فجر: صدقيني احسنلك واريح لك ...وبعدين اقدر اكلمك متى مابغيت وبأي حزه
سمر: لالا انا ماابغى اكلف عليك
فجر: والله لافيها كلافه ولاشي ..انا قلت اعتبريها هديه
ابتسمت سمر وهي تفكر بالهديه الحلوه اللي بتجيبها لها صديقتها العزيزه والغاليه ....فجر
:::::::::::::::::::::::
كان تعبان حيل واثار الطق واضحه على كل معالم جسمه ويالله واقف على رجوله عشان يكلمها:
ساره انصدمت لما شافته: جراح....شفيك ؟
جراح وهو يتلعثم بالكلام: ها...لا مافيني شي هوشه بسيطه
وقفت ساره من مكانها وهي تطالعه بنظرات بارده ....لفت ورى وطلعت من الغرفه ..
جراح: ساره....ساره
ماردت عليه وكملت مشوارها ....
وفي البيت:
ام ساره: ليش ياساره؟...ليش تخلين عنه ؟
ساره: انا ماتخليت عنه ...ابي ازعل عليه شوي ..ابيه يحس
ام ساره: من تغلى تخلى
ساره: يمه هذي مو اول مره يطقونه فيها ..وانا كذا مره انصحه واعلمه شلون يتصرف معاهم ..بس هو خواف يمه ..انا ابيه يقوم على رجله من جديد..مابيه جراح الضعيف اللي يخاف من كل شي ..ابيه يصير قوي وشجاع ومايخاف من احد...يمه جراح حتى الجهال صار يخاف منهم
ام ساره: والله ماعرفنالج ياساره..شوفيه شسوى يوم صار قوي وشجاع على قولتج...عشانج انتي ياساره ذبح الرجال ودخل بقضيه طويله عريضه..بس عشان يرضيج ويرضي غرورج...شجاعته اللي تكلمين عنها دخلته السجن بسبتج...واللحين تبين منه شجاعه ثانيه..يمكن توديه القبر وبسبتج بعد ..
ساره بحزن: صح كلامج يمه ...انا الغلطانه وانا السبب في كل اللي يصيرله...بس هذا مايعني ان الحياة انتهت ..يمه الحياة تمشي سواء بغلطنا والا بدونه وهذا مايمنع انا نبنيها من جديد
ام ساره: والله كلام المدارس هذا انا مااعرفه...مااقول غير الله يصلحج يابنتي...
ساره سرحت وقعدت تفكر بموقفها اللي صار مع جراح ..كانت مقتنعه باللي سوته بس امها قلبت موازينها؟..
ام ساره: ساره ...وين رحتي صارلي ساعه اكلمج ؟
ساره: هلا يمه انا وياج ...شكنتي تقولين؟
ام ساره: ابوج مسوي عمليه بعينه واللحين هو طلع من الطبيب شرايج نزوره؟
ساره: بس...
ام ساره تقاطعها: عارفه شنو بتقولين....بس هذا ابوج مهما سوى هذا ابوج وله حق عليج
ساره: انتي بتروحين؟
ام ساره: اكيد بروح معاج..اذا بتروحين
ساره: خلاص يمه نروح لابوي والله يستر
::::::::::::::::::::::::::::::
فيصل: مها...ردي علي لما اكلمك
مها: خير فيصل ..شتبي انت بعد؟
فيصل يحاول يتمالك اعصابه: كلميني بأدب ..كم مره افهمك انا ؟كم مره اقولك لاتقلين ادبك علي ؟
مها: اسفه
فيصل: سمعت هالكلمه مليون مره منك
مها :......
فيصل: حالتك مو عاجبتني ولازم اوديكي الطبيب
مها: أي قول انك بتخلص مني وماتدري شلون...كذا مره قلتلك طلقني وارتاح مني
فيصل: مها ...ارمي افكارك الخايسه هذي...والطلاق انسيه لاني ماافكر فيه
مها: الله يعيني عليك
فيصل: والله يعيني انا بعد
مها: فيصل..انت اللحين جايني عشان تغثني...
فيصل: لا والله بس عشان اونسك...اشوفك هاليومين مو على بعضك
مها: .......
فيصل: انتي ماتنامين عدل؟
مها:.....
فيصل وهو يسحب ايدها ويشوف اظافرها اللي كانت ماكله نصهم من القهر والحره اللي فيها : انا كنت عارف ان فيك شي...واقول البنت ليه مو طبيعيه؟
مها تسحب ايدها منه:طبيعيه ونص بعد...شقصدك يعني انا مجنونه؟
فيصل: ماقلنا شي بس لازم يشوفك الدكتور...يمكن فيك عقده ويقدر يحلها الدكتور
فيصل استفزها بكلامه وصارت تصرخ عليه ...لين ماطلع عنها وراح لسلوى وهو يضحك
سلوى: ماشالله...شعندك تضحك؟ ضحكنا معك
فيصل: اضحك على هالخبله اللي تحت...تصدقين انها تصرخ علي وتضربني بالمخده وانا مااقدر اسويلها شي
سلوى: بلاك منت برجال
اختفت الابتسامه على وجه فيصل وعصب لما سمع كلمتها ؟؟؟
سلوى تداركت كلامها: انا مو قصدي انت...انا قصدي يعني..مايصير تسكتلها.يافيصل هذي بعدين تمادى و..
فيصل: يعني وشتبغيني اسويلها؟
سلوى: يأخي وقفها عند حدها...اضربها مثلا
انزعج فيصل من كلامها: لا.. ضرب لا
سلوى: ليه خايف على مشاعرها تنجرح؟
فيصل: لا ياسلوى بس انا قطعت عهد على نفسي وعلى ربي اني ماامد يدي عليها..هذي مسكينه ياسلوى..يتيمه ومالها احد غير الله ثم انا حرام اعذبها ..كافيها اللي فيها
سلوى: ممكن سؤال بس تجاوبني بكل صراحه ؟
فيصل: أي تفضلي ..
سلوى: كنت تحبها؟
فيصل:......
سلوى: قول يافيصل عادي...الله يسلم خالتي ماخلت احد ماقالتله
فيصل: الصراحه إي كنت احبها......ولازلت
تضايقت سلوى من كلامه: اقول فيصل....انت شلون تثق فيها ؟
فيصل: وشقصدك؟
سلوى: يافيصل ياحبيبي ..انا قصدي انت شلون تضمن انها ماتكلم غيرك مثل ماتكلمك
عصب فيصل من كلامها وقام من مكانه وطلع لعامر ..
سلوى: هين يافيصل..اذا ماخليتك تشك حتى بنفسك مااكون انا سلوى بنت راشد
:::::::::::::::::::::::::::
فيصل: مبروك ياعامر واخيرا تدخل قفص الزوجيه
عامر : والله يافيصل حاس اني بظلم هالبنت معاي ..والله اني مااشوفها اكثر من اخت
فيصل: ماعليك من هالحكي...بكره لماتزوج انشالله ...مانقدر حتى نشوفك
عامر: ياعمي روح..اقولك اختي تقول مانشوفك
فيصل: المهم متى العرس انشالله؟
عامر: الشهر الجاي..واللي قاهرني انهم بيحطون عرسي بفندق وناس وطقطقه وخرابيط على غير معنى
فيصل: يارجال هذا عرس افرح وخل العالم تفرح بعد...
عامر: ...........
فيصل: عامر... احنا اصدقاء من الطفوله وماعمرك غبيت علي شي بس حاس انك هالمره ان فيك شي مضايقك ومنت راضي تقولي ...
عامر: مثل وشو يعني؟
فيصل: طبعا مالي حق اسأل ....عامر انت حاط وحده ببالك؟...يعني انت تحب؟
عامر بعد تفكير: لا ...ماناقص الا احب
فيصل: على راحتك اذا ماتبغى تقول فهذا شي راجعلك..
عامر: صدقني ماعندي شي اقوله...غير انك تقوم معي ..تراني مليت قعدة البيت
فيصل: وين بنروح؟
عامر: أي مكان ...المهم نطلع
فيصل : على راحتك
::::::::::::::::::

في المدرسه:
:::::::::::
فجر: يالله سماره قبل تجي الابله...خلينا نروح على الساحه الخلفيه مافيها احد
سمر: إي لحظه بس خليني اربط خيط الجوتي ...ماانفلت الا الحين
فجر: خلصينا ..عاد اليوم عربي حصتين....واو بنفتك منها
سمر: يالله امشي ...
وفي الساحه الخلفيه..كانت الحركه شبه معدومه..اشجار بلا غصون وملعب قديم ومخزن للكراسي ..
سمر: انا ماادري ليه خايفه؟ مع ان هذي مو اول مره اهرب فيها من الحصه ...بس اول مره اجي المكان هذا
فجر: معي انا لاتخافين ولاتحاتين ..
سمر: طيب اللحين بنقعد حصتين ...شنسوي؟نجابل وجه بعض؟
فجر: وانا عندي شي احلى من مجابل وجهك؟ لوبيدي اترك العالم كله واجابل وجهك ..
سمر تستحي وتنزل راسها: بس عاد فجوره
فجر: جايبتلك مفاجئه معي...نقدر نقطع الوقت فيها ونستانس للاخر
المفاجأه اللي مع فجر كانت بدايه لنهاية سمر.....
سمر بإندهاش: جواااااااال؟؟؟؟
فجر: ولك انت ياجميل
سمر: مااصدق...تدرين خلاص انا ماابغاه
فجر: هو على كيفك ترفضين هديتي ...كذا تخليني ازعل منك
سمر: لا خلاص كلش ولا زعلك...*وتغنيللها(رضاك انت غالي رضا الناس تالي..) *
فجر: الله على الصوت ولاشاكيرا ..
سمر:هههههه عن الطنازه..ويلا علميني شلون استعمله ؟
فجر علمتها كل شي ...
فجر: واللحين خلينا نستانس شوي....هذا الجوال بيدك وماعليكي غير انك تشيرين بالارقام ..واذا طلعلك شاب..تميعي بالكلام وتدلعي عليهم ..يلا جربي
سمر: نعم؟؟؟ لا حبيبتي مستحيل...مالك امل اسويها
فجر: انتي ليه هبله؟ صدقيني مراح تخسرين شي...ومحد بيدري عنك
سمر: فجر الله يخليكي خلينا نقوم هذا الجرس طق واذا سألتنا الابله وين كنتم بنقول أي عذر...انا صراحه خايفه من المكان وحاسه ان اللي نسويه غلط
فجر: طيب انتي جربي والله مراح تخسرين شي ..وبعدين انا ضامنه المكان ..صدقيني محد راح يجي
سمر بعد تفكير: طيب راح نقعد هنا...بس شيلي الجوال ..احس انه مو وقته
فجر: خلاص اللي يريحك ...ممكن تقوليلي اللحين متى بتزوريني لاحظي انك وعدتيني كذا مره واخلفتي بوعدك ...وهذي الصفه مو حلوه ..توعدين وتخلفين هذا شي كلش مايمشي معي
سمر: طيب انا اسفه ...ممكن تقبلين اسفي؟
فجر وهي تحط راسها على رجول سمر: واذا ماقبلت اسف حياتي وعمري منو اقبل اسفه؟
سمر استغربت من حركتها وكان ودها تقوم او تطلب من فجر تقوم عنها بس استحت ...
::::::::::::::::::::::::::
اليوم جدول اعمالها مزدحم والشغل كله متكدس عليها..صارلها يومين مااشتغلت بسبب حالته النفسيه الصعبه
كانت تنشر الغسيل فوق السطح ....وسمعت صوت تصفير وراها..
مها: هذا انتي ..ماتجوزين عن سوالفج ..حسبي الله عليج خرعتيني..
مروه (17سنه) اخت سلوى بنت حبوبه حيل وبالفتره الاخيره تعرفت على مها ..وكانت الانسانه الوحيده اللي تخفف عن مها ولو بعض احزانها...ولما وصلت اخر سنه بالدراسه طلعت من المدرسه بسبب اخوانها ..
مروه: اسم الله على قلبك...انتي تعرفين تخرعين ؟
مها: ليش؟ مالي قلب
مروه: يبا اسفين لك قلب وقلبين بعد....ها اشوف اليوم عندك غسيل ملابس تحبين اساعدك؟
مها: والله اذا تحبين تخففين علي من العذاب...فحياج الله
مروه وهي تنقز من سطحهم الى سطح ام فيصل اللي كان عباره عن طوفه مشتركه بينهم : اذا تبين اموت فدى هالعيون انا حاضره..
مها وهي تضحك: شوي شوي لا تطيحين....ماادري متى بتعقلين ؟
مروه: لا ماعليك اعجبك ...انا لما كنت صغيره مع عيال خالتي كنا دائما نلعب هنا وماكان احد يجي هالمكان غير الخدامه ..
مها بإستغراب: تلعبون هني؟..مااشوف في شي يونس ؟؟
مروه: كان في قطع خشب كنا نسوي فيهم بيوت وخرابيط بزران ...
كانت مروه تنشر الغسيل وتساعد مها بكل جد واجتهاد ...
مها: مروه...على الرغم من انج اخت سلوى الوحيده ..الا ان الاختلاف بينكم كبير حيل
مروه: صدقيني يامها ان سلوى اختي طيبه حيل بس انا مدري ليه تغيرت مره وحده؟
مها: معقوله ماتدرين؟
مروه: امممم يمكن غيرة حريم....الا خلينا من سالفة سلوى وخبالها...وقوليلي شخبار فلفله؟
مها: ومنو فلفله بعد؟
مروه: فصول زوجك منو غيره؟
مها: مروه ووجع ...طايح من عينك..فصول
مروه: ماقلتيلي وش اخباره؟
مها:عادي..مافي شي جديد ....انتي قوليلي ليش ماتكلمين عن دراستج؟
مروه: مدام اني عرفت اقرى واكتب ..وشوله اعور راسي بعد؟
مها: أي بس هذا مستقبلج ...وترى مانافعج الا شهادتج
مروه: اسكتي بس .انا ماصدقت اطلع وافتك...ومستقبلي عند زوجي وعيالي
:::::::::::::::::::::::
في المدرسه:
سمر: فجر قومي...الابله صاحبة الظل الطويل ..جايه صوبنا..
فجر: يلا قومي بسرعه ....عاد هذي الابله مليغه وماتنتفاهم
وتنحاش سمر مع فجر..من الصوب الثاني...والابله لما شافتهم يركضون ركضت وراهم ..بس للاسف مالحقت عليهم لانها تعثرت بجلبابها الطويل...
فجر وسمر وصلوا الصف وكان الوقت فسحه وهم ميتين ضحك على شكل الابله..وارتاحوا لما تأكدوا من البنات ان ابلتهم العربي مالاحظت غيابهم عن الحصه...
::::::::::::::::::::::::
على الغدا فيصل ومها لحالهم:
فيصل: ماشالله شايف النفسيه مرتاحه اليوم..
مها وهي تبتسم: الحمدلله اليوم احس اني نشيطه ومتفائله الى حد ما
فيصل: حد ما؟ مافهمت؟ ممكن توضحيلي ياام النفسيه المرتاحه
مها: مرتاحه لاني ماشفتهم ...ولاكلمتهم
فيصل: اهااا...تقصدين سلوى وامي؟
مها: اسفه فيصل بس ابتعادهم عني يحسسني بالامان نوعا ما ..
فيصل: وشفيك اليوم ماسكه علينا حد ما ونوعا ما؟
مها تضحك: فيصل...عندي طلب
فيصل: خير وشهي طلباتك؟
مها: ودي...ودي اروح الكويت
فيصل تغيرت نظرته لها: وانتي وشعندك بالكويت ها؟
مها: فيصل والله حاسه اني مخنوقه وودي اغيرجو
فيصل وهو يقوم من الاكل: الا قولي بتقابلين حبيبك مليتي مني
مها انصدمت من كلامه: فيصل ليش تقول جذي؟ هذا مو كلامك؟ أي حبيب واي بطيخ
فيصل: علينا هالسوالف...لكن عناد فيك وفيه...احلمي اوديك الكويت ...غوري عن وجهي
الظاهر ان مها مو مكتوب لها يوم واحد مع السعاده..."معقوله فيصل يتهمني بشرفي هذا اخر شي اتوقعه منه"
:::::::::::::::::::::
ساره: لو سمحت ممكن تناديلي جراح بدر ؟.
......: اختي كم مره اقولج ناديته بس مو راضي يشوف احد
ساره: زين...قوله ساره ..
.......:لحظه شوي
بعد مرور10 دقايق
.......:اسف اختي مايبي يشوف احد
ساره: انت قلتله ساره؟
......: أي قلتله وقال مابي اشوف لاساره ولاغيرها
ساره: ليش شفيه؟ اهو مريض؟
......: لا يااختي مو مريض بس مايبي يشوف احد.
طلعت ساره من عند العسكري وهي تفكر بحركة جراح...."ليش مايبي يشوفني؟"
وفي السجن...جراح وصديقه اللي تعرف عليه بالسجن ناصر:
ناصر: جراح ترى انت غلطان حركتك هذي مالها معنى...
جراح: وشتسمي حركتها؟ يوم مشت وخلتني
ناصر: حركه لا اراديه ويمكن تكون عفويه بعد
جراح: اسكت بس ...ساره طول عمرها مغروره....ولايمكن اكسب قلبها ابد ...هي تشوف الناس من فوق
ناصر: مااعتقد... عقب كل اللي سمعته منك عنها اقول لايمكن تكون بقلبها ذرة غرور
جراح: ياخوي انت ماتعرفها....انا اللي عشت كل عمري وضيعت كل سنيني برجواها ...تشوفني بالسجن الحين ترى بسبتها ...ضيعت سنيني وشبابي وسمعتي بس عشانها
ناصر: جراح ترى محد طقك على ايدك ...انت اللي بغيت الشقا لنفسك
جراح: صح انا الغلطان..وانا اللي اتحمل...بس شتقول بالقلب اللي مابغى غيرها؟
ناصر: مااقول غير الله يعينك ويصبرك......
:::::::::::::::::::::::::::::::::::::::::::::

في بيت فجر صديقة سمر:
فجر: واخيرا....مابغيتي تيجي؟
سمر: حبينا نتغلى
فجر: فوق غلاكم تحبون تغلون......والله والله غالييييييييييييين
سمر: طيب وشعندك من جديد ؟
فجر: شريط رقص شرقي جديد....خابرتك فنانه بالشرقي
سمر: اسم علي لاتحسديني...طول عمري فنانه
فجر وهي تحط الشريط بالمسجل : طيب ورينا شطارتك
سمر: احد من اهلك بالبيت؟ لاني بفصخ عباتي زهقت منها
فجر: اخذي راحتك ....الجو صافي اليوم..
سمر كانت لابسه تحت العبايه تنوره جنز تحت الركبه بشوي..وتيشرت ابيض علاق فيه كلام بالانجليزي..جسمها فضيع مربربه لاضعيفه ولامتينه ..وقصيره شوي وهذا الشي محليها اكثر ...
شعرها كان ناعم ولحد كتوفها ....سمر بيضه وبشرتها ناعمه وصافيه ...عيونها عسلي غامج وشفايفها ورديه
فجر: يالله سماره قومي ورينا الرقص اللي ولاشاكيرا
سمر: لا مالي نفس ارقص
فجر: يالله عاد...والا لك نفس ترقصين بس بالمدرسه ؟
سمر: خلاص ارقص بس على شرط ترقصين معاي...
فجر: حااااااااااااااااااااااضر
وبعد الرقصه القصيره نسبيا...
فجر: ماشالله...منوين تعلمتي ترقصين كذا؟
سمر: الصراحه من بنات خالتي ...وتعلمت اكثر لما رحت مع امي لندن وكنت اروح للسكيتي وتعرفت على بنات خليجيات وتعلمت منهم ...
فجر: سمر حبيبتي ممكن طلب؟
سمر: والله اذا قدرت عليه مراح اقصر معاك
فجر: ابغى...يعني ودي اصورك وانتي ترقصين بجوالي
سمر: نعم؟ لا حبيبتي اسفه....
فجر: سماره الله يخليك والله انا مااستغنى عن شوفتك دقيقه...
سمر: طيب اعطيكي صورتي...شرط يعني بالجوال؟
فجر: حياتي بالجوال غير...احس بحركتك... بصوتك...يعني احس انك موجوده معي بكل دقيقه
سمر: وانا مااشوف ان لها أي معنى
فجر: قولي انك مو واثقه فيني وخلاص
سمر: لاوالله مو عن...بس اخاف يضيع الجوال والا شي...وبعدين انا اللي انبح
فجر: يضيع وانت فيه؟....والله لأحطه بقلبي واسكر عليه
سمر بتردد: خلاص....بس يكون بيني وبينك وماتخلين احد يشوفه
فجر: يكون بعيوني واسكر عليه ياقلبي...
قدرت فجر تفر عقل سمر الصغير وتوهمها بأشياء مالها وجود....للعلم فجر كانت اكبر من سمر بسنتين ولكن لكثرة رسوبها ولحظ سمر السيء القاها القدر بين يديها..........وصورتها بالجوال وهي ترقص شرقي
:::::::::::::::::::::::::::::::
فيصل ندم على كلامه اللي قاله لمها .......
" مها..حبيبة قلبي انا...اشك فيها؟ واصدق كلام سلوى اللي ممكن انها تتبلها عليها...هذي سوالف الحريم اذا حاشهم مرض الغيره مستعدين يقتلون اللي قدامهم مو بس يتبلون عليه "
طرد الشكوك والهواجيس المتعبه من راسه وقرر يروح لمها ويعتذر منها ....وين راحت ماهي بغرفتها؟.
لقاها....بس بأي حاله لقاها...شافها ...وتمنى عيونه انعمت قبل يشوفها بهالحاله...كان يدري انها تعيش بذل بس مو بهالطريقه........صعب انك تشوف انسان عزيز على قلبك...يمسح ارضية الحمام(الله يعزكم)...وصعب اوصفلكم شعور فيصل وهو يشوف احب خلق الله لقلبه تمسح اقذر مكان بالدنيا....

:::::::::::::::::
فيصل: اسألك برب البيت ...انك تهدين اللي بايدك

مها:...........

فيصل: مها...كافي وقفي خلاص انا ماعاد اخليكي تشتغلي

مها:.........

فيصل : مها اطلعي بغيت اكلمك

مها: شبغيت؟

فيصل: بغيت ....اوديك الكويت الاسبوع الجاي

مها: ومن قالك اني بروح؟

فيصل: انتي اللي قلتيلي..

مها: قلت وندمت..

فيصل: وانا بعد قلت كلام وندمت عليه ...واللحين انا جاي اعتذر منك...ها وشرايك تسامحيني؟

مها تركت اللي بإيدها ووقفت تطالعه وبعصبيه قالت: كم مره يافيصل تغلط وكم مره تبيني اسامحك؟ ممكن اسامحك على اي شي لكن انك تتهمني بشرفي وبأخلاقي ترى هذا شي ماينسكت عليه …وجرح صعب انك تداويه…يعني انا عشان حبيتك في يوم من الايام….صار كل يوم لي حبيب؟

فيصل وهو يمسكها مع ايدها ويطلعها برى الحمام: مها خلاص اعذريني ترى كل انسان يغلط ومحد معصوم من الخطأ وانا ندمت على اللي قلته لك وجاي اصحح غلطتي واراضيك …

مها: تراضيني بشنو؟

فيصل: قلتلك بنسافر الاسبوع الجاي ..للكويت

مها: تظن اني بفرح؟….انا من لي بالكويت ؟عشان افرح اذا رحتلها

فيصل: طيب ليه قلتيلي ودني؟

مها:……

فيصل: خلاص انا قلت الاسبوع الجاي يعني الاسبوع الجاي …وبنروح لوحدنا

مها: انا وياك بس؟

فيصل بحنان: إي بس انا وياك وننسى كل مشاكلنا وهمومنا ونرجع مثل اول واكثر…يامها انا على الرغم من اني تزوجت سلوى واهملتك بالفتره اللي طافت ترى مو معنى هذا ان قل مقدارك عندي بالعكس انا حبي لك عمره مابينتهي وعمره مابيوقف عند حد….وبظل احبك للابد وياريتك توثقي فيني…

مها: انك تطلب شخص ويحرمك…انك تعلق اخر آمالك بشخص ويخذلك...انك تحب انسان ويكرهك …شعور يستحال بعده انك تثق بأي انسان!!!

فيصل: على الرغم من اني مافهمت معنى كلامك بس اقولك ان عمري مابخذلك وعمري مابحرمك وعمري مابكرهك ….انتي مني وفيني….واللحين ممكن تقوليلي وشينقصك للسفر..؟
:::::::::::::::::::::::::::

اليوم الخميس الظهر سمر قاعده بالصاله وسعيد بالمطبخ يشوف العيش"الاخ نسواني"….
ويقول للخادمه: زيدي المويه ماتشوفي العيش كيف ناشف

سمر وهي داخله المطبخ عقب ماشبعت مكالمات: بعد تطورنا صرنا ندخل مطابخ ونسوي عيوش…ماشالله اللهم زد وبارك…ربة المنزل سعيده اليوم عندها طبخه

سعيد: تقلعي انتي محد كلمك…
ويطلع سعيد من المطبخ..اما سمر فشربت ماي وطلعت للصاله ولقت سعيد منسدح يطالع التلفزيزن ..حطت ايدها على راسها وهي تقول: للحوووووووووووووووول حتى هنا لاحقني؟

سعيد: انا اللي لاحقك والا انتي وين مارحت وراي كنك عصعصي

سمر: والله لأقول لابوي يشوفله صرفه معك ..

في هاللحظه دخل عامر:

عامر: السلام عليكم

سمر: وعليكم السلام والرحمه جيت بوقتك

عامر: خير وشصاير؟

سمر: الحقني ياعامر…والله بموت من هالسعيد …بعرف ليه مايطلع من البيت ؟

عامر: سعيد وشفيك عليها؟

سعيد: هذي ام لسانين وين مارحت تلحقني …

سمر تقاطعه: قوم اطلع ترى برجع من كثر مااشوفك

وتدخل عليهم الخادمه:

الخادمه: بابا عامر…شوف سعيد هذا ..خرب عيش مال انا ..انا سوي عيش نثري هو يزيد مويه ..اللهين عيش خلاص خربانه…احترق عيش..انا مخ خراب

ويضحك عامر مع سمر

سعيد وهو معصب: انا اروح غرفتي اشرفلي من مجابلكم

سمر: مااقول الا الله يعين عنود عليك

وعقب ماراح يقعد عامر وتقعد عنده سمر:

عامر: خليه يبا يروح عند زوجته ..هي اولى بمجابله منا

سمر: عامر ترى مو حاله هذي …على طول قاعد بالبيت ..ترى صديقاتي مايزوروني والسبب هو

عامر: اتركيه عنك اللحين وعلميني عن دراستك

سمر: الحمدلله ماشي…بس عامر في درس بالرياضيات ماني فاهمته..انا خابرتك علمي وتحب الرياضيات ممكن تفهني ولو ماعليك امر

عامر: افا عليك هو درس واحد….الا جيبي المنهج كله افهمكياه

سمر: تسلملي يااحلى اخ …واحلى من سعيد بعد
:::::::::::::::::::::::::::

مها: ادخلي والله خالتي مو هني..

مروه: وسلوى وين؟

مها: عندها مراجعه بالطبيب

مروه وهي تقعد بالصاله: اليوم هدوء.يعني ناخذ راحتنا بالسوالف

مها: وشعندج من سوالف؟

مروه: مها والله ماني مرتاحه بصالة هالعجوز الشمطا…خلينا نروح غرفتك

وتروح مروه مع مها للغرفه ويسكرون الباب ويقعدون يسولفون …

وبعد ساعه الا ربع يدخل فيصل مع سلوى للصاله ….سلوى قعدت بالصاله وفيصل توجه لغرفة مها عشان ياخذ جوازها يجدده ….اول مافتح الباب حس بمقاومة مها للباب تمنع فتحه..

فيصل : مها وشفيك مغير انا فيصل ؟

مهابإرتباك: فيصل روح اللحين بعدين تعال

فيصل: ليه عاد؟ انا جاي عشان..

مها تقاطعه : فيصل بعدين بعدين

يدخل فيصل الصاله وهو مبتسم: الظاهر مها مشغوله وماتبغاني ادخل عليها

سلوى وهي تصرخ: فيصل الحق في رجال غريب ببيتنا

فيصل بإنفعال: وينه؟

سلوى: اكيد بغرفة مها

فيصل بعصبيه: وشتقولين انتي؟

سلوى: وشتفسر وجود هالعباة الغريبه بالصاله؟ (عباة مروه كانت ناسيتها بالصاله لكن الظاهر ان سلوى ماميزت عباة اختها )…

فيصل:……

سلوى: وشتفسر منع مها لدخولك لغرفتها….اكيد الرجال عندها

فيصل يتوجه لغرفة مها وبكل مااوتي من قوه يدفع الباب دفعه وحده …وفي قمة عصبيته…كان وده يذبح مها واللي معاها ….لكن اللي معاها طلع مخلوق ضعيف حاله حال مها..

انحرج فيصل من موقفه وحاول انه يبرر اللي صار لما شاف مروه…لكنه مانطق بأي كلمه وطلع لسلوى

سلوى تبكي عقب الطراق اللي اكلته من فيصل : حرام عليك انا وشذنبي تضربني؟

فيصل وهو يصرخ عليها: اختك يالظالمه خليتيها رجال؟…اعماك الكره حتى انك تشوفي اختك رجل والا حرمه

وصوتهم كان واصل لي تحت..

مروه: انا بطلع اللحين الصراحه موقفي سخيف

مها: شلون تطلعين واختج بهالحاله؟ مروه فيصل عصبي واخاف يصير فيها شي ..لاتنسين انها حامل

مروه وهي تلبس عباتها: وانشالله تبيني اطلع عندها …بكيفهم

مها: انا اسفه مروه على تصرف فيصل اللي مااقدر حتى اعرف له اي معنى

مروه: تأسفي لغيري…انا عاذرتك بكل الاحوال ..لاني ادري ان مالك ذنب الذنب ذنبي..

ولما طلعت مروه....كانت مها تفكر انها تروح لسلوى وفيصل فوق ....

دخلت الشقه...ولقت باب الغرفه مفتوح ...فيصل كان قاعد على الكرسي اللي عند السرير وكان يتكلم بالجوال..اما سلوى كانت بالغرفه الثانيه تبكي....

مها دخلت بالغرفه اللي كانت فيها سلوى ...

مها بتردد: سلوى...

سلوى رفعت راسها تطالع مها ورجعت راسها بين كفوفها...

مها وهي تقرب من سلوى: سلوى ترى اللي صار مايستاهل

سلوى:......

مها: انا مااعرف السالفه بالضبط ..بس اتمنى انج ماتسوين في عمرج جذي..
سلوى وهي تصرخ: ومدام انك ماتعرفين السالفه شله تدخلين عمرك؟ انت السبب في كل اللي حصلي ..وبعدين ليه جايه هنا ها؟ عشان تورين فيصل انك طيبه ومسكينه...اطلعي برى انا ماابغى اشوفك ..

وعلى صوت صراخ سلوى دخل فيصل عليهم وشاف سلوى تصارخ على مها بينما مها واقفه بذهول تطالعها

فيصل: مها خلاص خليها بحالها...

مها: وانا شقلتلها؟...انا بس جيت اواسيها و..

تقاطعها سلوى: ومن قالك اني ابغى حد يواسيني ؟

فيصل: مها خليها وتعالي ابغى اتكلم معك شويه.....

سلوى: أي روح وتكلم مع حبيبة قلبك على راحتك واتركني انا للضرب ..

فيصل كان بيرد عليها..ولما شافتها مها حرب كلاميه مستحيل تنتهي بسهوله قالت: فيصل انا انطرك تحت..

وفي غرفة مها:

مها: ممكن اعرف شنو اللي صار بالضبط؟...

فيصل: ماصار الا الخير!!

مها: أي خير اللي يخليك تفتح الباب علي بكل هالقوه ؟ واي خير اللي يخليك تطق سلوى ؟ هذا وهي حامل

فيصل: ماعلينا اللحين من سلوى ولا من غيرها..سلوى غلطت وكل من غلط ياخذ جزاه

لما شافته مها يتهرب من الاجابه قالت: انزين شنو السالفه اللي تبيني فيها؟

فيصل: ابيك...تأجلين سالفة السفره

مها: وليش؟

فيصل: عشان عرس عامر صديقي

مها: ومتى عرسه؟

فيصل: بعد اسبوعين انشالله !!

مها: بعد اسبوعين!!بس انت وعدتني انك توديني الاسبوع الجاي يعني تو الناس على العرس

فيصل: إي بس انا الاسبوع الجاي بسافر مع عامر للمنطقه الشرقيه...

مها بإنكسار: صار عامر اهم مني؟؟

فيصل بحنان: لا ياحبيبتي لا تاخذين الامور بحساسيه زايده...انتي تدرين هذا عامر ماهو أي واحد ...هو اللي وقف معي وساعدني بأمور كثيره منها اني ارتبطت بأحلى انسانه ...اللي هي انتي

مها: إي سكتني بهالكلام الحلو

فيصل: هههههههه ...ياقلبي انتي

مها: فيصل بس عاد ...

فيصل: يعني منتي بزعلانه عشان اجلنا السفر

مها: لا عادي مدامك بتوديني بعد العرس انشالله ...

فيصل وهو ينام على السرير: الله يجازيك ياسلوى....تدرين اني لمااقعد معاها احس بالفرق الكبير بينك وبينها

مها: اكيد بتحس بالفرق....بعد هذي الغاليه ام عيالك

فيصل بعد تفكير: الغلا مايجي من العيال يامها...متى بتفهمين ان الغلا مكانه القلب ....ياقلبي
::::::::::::::::::

الجزء الخامس عشر :


في الكويت وتحديدا في بيت ام ساره:
:::::::::::::::::::::

ساره: يمه شفيه هذا؟؟؟تصدقين رافض يشوفني نهائيا..

الام: اخاف انه زعلان عليج؟

ساره: وشنو اللي يزعله؟ مافي شي يستاهل الزعل

الام: او يمكن مريض؟

ساره: مافيه الا العافيه....بس مايبي يشوفني انا متأكده من هالشي

الام: والله ياساره ماادري عنه ..يمكنه متضايق من شي ؟ المهم بروح مكتب الخدم اقدملي خادمه تروحين معاي؟

ساره: لاوالله يمه مالي خلق ...وراي بحث بروح اكمله

الظاهر ان البحث اللي تكلم عنه ساره هو موقف جراح ..لانها طول الفتره اللي كانت تكتب فيها البحث كان كل تفكيرها مع جراح لذلك قررت انها تكتبله رساله....
‎( بسم الله الرحمن الرحيم )
الى الغالي..جراح
الصراحه انا مااعرف شكتبلك او بشنو ابدي ..انا عمري ماكتبت رساله..بس حبيت اتبع نفس اسلوبك وانا متأكده انك راح تقراها حتى ولو مابغيت تشوفني.....
ممكن اعرف ليش ماتبي تشوفني؟ جراح ارجوك فهمني ترى انا محتاره ...انا متأكده اني ماغلطت بحقك...انت بالذات لا يمكن اغلط بحقك ...انا اعترفلك ويمكن اعترفتلك مية مره اني كنت انانيه ومغروره لكن اللحين تغيرت والله يشهد على كلامي..انا مابيك تتبع مثل اسلوبي اللي كنت اعاملك فيه معاي ....والله لو ادري ان الجفا يعذب هالكثر جان عمري ماجفيتك ...خلاص جراح كافي والله مااعرف اعبر اكثر ..احس بقلبي كلام واجد بس ماني عارفه شلون اكتبه...لاتذلني اكثر كافيني اللي فيني...
ساره
::::::::::::

جراح عقب ماقرى الرساله حن لساره وقرر انه يطلعلها مره ثانيه لو زارته...

ناصر: يالاخو.....وين وصلت؟

جراح: هلا ناصر معاك

ناصر: أيمعاي الله يخليك؟..الا قول وشسالفة هالرساله؟ ...من منو؟

جراح: ماعليك من الرساله وقولي شخبار اخوك للحين زعلان عليك؟

ناصر: بكيفه ياجراح انا تعبت معاه ..تدري ليش هو زعلان؟

جراح : ليش؟

ناصر: انت مثل ماتعرف اخوي حامد شخصيه معروفه بالبلاد لكن اللي ماتعرفه انت واللي مايعرفه الناس انه بخيييييييل بالحيل

جراح: معقوله؟ زين شدخل هذا بزعله منك ؟

ناصر: اخوي حامد يسوي روحه زعلان مني ويعصب اذا احد جاب طاريي عنده وكل هذا تمثيل منه عشان محد يقوله وكل محامي لأخوك..شفت البخل وحبه للفلوس وين وداه؟

جراح: واهلك؟ واخوانك الثانين ؟

ناصر: جراح...انا اذنبت..نعم اذنبت..وتماديت..غلطت بحق نفسي وبحق غيري وبحق ربي وبحق اهلي..كنت شاب ضايع وصايع ومحد يسأل عني معطيني الخيط والمخيط..تعرفت على شله فاسده وقدروا يأثرون فيني وحببوا لي الحرام وزينه الشيطان في عيني وفوق كل هذا كنت ضعيف ايمان ومافي وازع ديني بقلبي يوقفني عند حدي..تعلمت شرب الخمر وادمنت عليه ...تعلمت لعب القمار وهما ادمنت عليه وهو اللي كان فيه ضياعي...حصلت مشكله بيني وبين احد العاصين وكانت مشكلة فلوس ..مابي اذكر التفاصيل واعور راسك معاي ..لكن اللي حصل اني ترصدت له انا وواحد من ربعي وبعد هوشه بسيطه معاه ذبحناه ....وهذا انا اواجه الموت هني...حكموا علي مؤبد اما رفيجي اللي كان معاي حكموا عليه عشر سنين ومات في السجن...تصدق صارلي 12سنه بالسجن في كل يوم منهم في كل دقيقه وفي كل ثانيه اتندم الف مره واستغفر ربي الف مره ..ضاع شبابي ومستقبلي ,,,اللي مثلي اللحين متزوج وعياله طوله...لكن الله كريم وعساه يغفرلي انشالله

جراح حس بعمق المأساة اللي يعيشها غيره..واللي يشوف بلاوي الناس تهون عليه بلاويه....
:::::::::::::::::::ا

الخميس الصبح...عرس عامر..
.وفي البيت

سمر: وشعليك معرس جديد ..

عامر: واللي يعافيك لاتذكريني

سمر: وشلون مااذكرك وعرسك بعد ساعات؟

عامر: بعرف انتي كل خميس..ماتقعدين الا الظهر ..اشمعنا؟ هاليوم بالذات صاحيه من فجر الله؟

سمر: تدري عاد انا ماودي انك تاخذ منيره حرمة حسين

عامر: صحيح والله؟؟واخيرا لقيت احد يفهمني بهالبيت

سمر: انا ادري انك ماتبغاها...والصراحه ماالومك ..بس احب اقولك معلومه..ترى الحب يجي بعد الزواج وكثير من الخبراء والمحللين اكدوا هالنظريه

عامر: ماشالله...وانتي حضرتك مستمعه جيده لمثل هالشغلات ...ودروسك ساحبه عليهم السيفون؟؟

سمر وهي طالعه: ياربييييي في احد بيوم عرسه يفكر بالنصايح والدروس...بروح اتسبح عشان عزيزه وغيداء بيمروني بعد شوي بنروح للصالون
عامر: وانتي ماتعرفين تضبطين امورك بنفسك ؟

سمر: خواتي وملزومات فيني...

طلعت سمر من عند عامر اللي تم يفكر بأسوء يوم في حياته...
::::::::::::::::::::
الخميس المغرب:

فيصل: يالله ياسلوى لانتأخر عن العرس

سلوى: مانيب رايحه

فيصل وهو يقعد بجنبها: ليه ياسلوى؟

سلوى: كذا...ابغى افشلك مثل مافشلتني

فيصل يضحك: خلاص احنا مو تراضينا ...يعني طاح الحطب

سلوى: طيب انا كنت امزح معك ..

فيصل: يالله ياحلوه قومي تلبسي وتزيني وانا بمرك عقب صلاة العشا

سلوى: خالتي بتروح؟

فيصل: إيه اكيد الوالده تروح

سلوى: و....مها بتروح؟

فيصل: إي والله ذكرتيني...انا مدري ليه حاط هالانسانه على هامش التفكير مع انها ماخذه كل تفكيري ؟

عصبت سلوى لما سمعت كلماته الاخيره لكن فيصل ماعطاها فرصه ترد عليه لانه نزل تحت ..

وفي غرفة مها اللي كانت نايمه..."<اليوم درجة حرارتها مرتفعه>"..
فيصل يقعد بجنب مها على السرير ويمسح على راسها وحس بحروره : مها ..

مها:....

فيصل وهو يرفع صوته شوي عشان تصحى: مــــهــــا

مها وهي تقلب على السرير: فيصل والله مافيني حيل على الشغل اليوم خله باجر...تكفى قول لخالتي والله تعبانه

فيصل: ومن قالك اني بخليك تشتغلي...حرارتك مرتفعه قومي اوديك الطبيب قبل اروح العرس بعد شوي وانشغل

مها: لا لا مابي اروح الطبيب والله مليت منه ..انا بخير ..والحراره مهما ارتفعت مردها تنزل روح انت ولاتحاتي

ويطلع فيصل من دار مها وهو متردد وخايف عليها ....
::::::::::::::::::::::::::::::::
في الكويت...في السجن ...:

ساره: ممكن تعطيني سبب واضح يخليك ماتشوفني كل هالايام اللي طافت؟

جراح بسخريه: وانتي؟...ممكن تعطيني سبب واضح ..

تقاطعه ساره بعصبيه: جراح انت شفيك؟ليش تغيرت؟ الصراحه السالفه ماتسوى..ليش مكبرها ؟

جراح: لانج تخليتي عني في الوقت اللي كنت فيه محتاجج..

ساره:.....

جراح: اكيد بتسكتين ماعندج شي تقولينه..

ساره: انا ماتخليت عنك وعمري مابتخلى عنك

جراح:انزين ممكن تفسيريلي الموقف السخيف اللي حصل منج؟
ساره: لحظة ضعف...انا ماتحملت اشوفك بهذاك الوضع

جراح : وتحملتي تشوفيني مجرم...تحملتي تشوفيني وحش..ها؟

ساره خافت من طريقته بالكلام: الظاهر اني غلطت بحقك ..بس مهما كان المفروض انك تسامحني وتاخذ بالاسباب..

جراح بضيق: اسكتي الله يخليج..الصراحه انا مليت من هالعيشه

ساره: انا بعد مليت

جراح: شنو مليتي منه؟ مليتي من الحريه!!؟ مليتي من النوم المريح؟؟ مليتي من الاكل السنع؟؟ مليتي من الراحه ..

ساره وهي تحاول تخفي دموعها: مليت اعيش بعيده عنك ....والله مليت

تم جراح يطالعها بنظرات وجنه مو مصدق...

ساره وهي توقف بتروح: لاتكرهني مدام اني بديت احبك ....ارجوك لا تكرهني ..

تطلع ساره منه وهو مبتسم بين مصدق وغير مصدق ومن شدة تفاجئه ماقدر ينطق بكلمه ؟؟
:::::::::::::::::::
وصار عرس عامر من احلى العروس بعايلتهم ...كل الناس سعيده وفرحانه ..والكل عاش سعادته على طريقته...فجر حضرت العرس وطبعا مابقى رقصه مع سمر الاورقصتها والكل استغرب من حركاتهم بس على ابو عرس عادي...سمر كانت حلوه بكل معنى الكلمه ..شعرها القصير مسويته كيرلي(curly) ومكياجها وردي لايق مع نفنوفها الاسود...اما العروس كانت عاديه يعني موذاك الزود بس مبين عليها بعدها صغيره...سلوى وخالتها حضروا العرس ...

اما عامر كان يحاول يفتعل الفرحه ..لكن ويينه ووين الفرح اللي هجر قلبه ...كان كل تفكيره بمستقبله اللي كان يحلم يكونه مع اللي اختارها قلبه ..في مثل يقول(ليس كل مايتمناه المرء يدركه)..

فيصل...كان يفكر بمها ويتصل عليها بين كل فتره عشان يطمئن عليها ...
ويدخل المعرس الصاله ويصور مع اهله واخوانه وعروسته ويطلع عنهم مع العروسه للفندق...
:::::::::::::::::::::::::::::::

في بيت فيصل وبعد مارجعوا من العرس....فيصل يدخل على مها اللي كانت على السرير نايمه وشكلها ماقامت من يوم راحوا للعرس...

فيصل: مها ...فيك شي؟ احس انك مو على بعضك

مها : هلا فيصل..متى رجعتوا؟

فيصل: شكلك تعبانه حيل..

مها: احس اني مخدره

فيصل بشفقه: الجو بارد حيل...ليه ماتكثرين من اللبس؟

مها تتكلم بصعوبه: فيصل واللي يعافيك ممكن تعطيني الحبوب على الدرج اللي وراك؟؟.

فيصل: ياحياتي هذي المهدئات لا تنفع ولاتفيد خليني اوديك للمستشفى

مها : بس فيصل والله لاعت جبدي من طاري المستشفيات..مامليت منها؟

فيصل: بس انتي تعبانه مافيها شي لوكشف الدكتور عليكي...خليني اتطمن

مها: للهدرجه اهمك ؟

فيصل: ماهو وقته هالحكي يالله قومي البسي عباتك..

قامت مها معاه وهي كارهه انها تروح بس هي فعلا تعبانه ومحتاجه تروح..

فيصل يطلع مع مها من الغرفه وهي متسنده على ايدها..بينما كانت امه تصلي الوتر بالصاله واول ماسلمت..

ام فيصل: على وين؟ على وين؟ ترى الساعه اللحين 2 بالليل اذا ماتدرون

فيصل: يمه ...مها تعبانه وابغى اوديها المستشفى

ام فيصل بإستنكار: وشوووو؟؟؟ وطويلة اللسان ذي ماجاها تعبها الااللحين يوم شافتك تعبان وتبغى تنام؟

فيصل: انا اللي اصريت انها تروح.. ماتشوفي حالتها كيف تعبانه؟

ام فيصل بإستهزاء : ياحرام....لالامسكينه

ويطلع فيصل مع مها عنها لانه يدري انها مابتنتهي من كلامها اللي يغث الواحد...
::::::::::::
كانت قاعده على السرير ..مستحيه ومنزله راسها تحت ...كانت تظن ان عامر رجال قبل انه يكون اخو زوجها القديم...

عامر: انا خذيت بطانيه ومخده وراح انام بالغرفه الثانيه...تقدرين تنامين على راحتك..

استغربت منيره من حركته...مهما كان صح انا زوجة اخوه المتوفي بس قبل اكون زوجته انا انثى بطبيعة الحال...معقوله عامر غاصبينه على الزواج مني...لالامااظن عامر رجال ولايمكن يكون مغصوب علي..مااقول غير ياخسارة هالمكياج والتسريحه...خل انام احسنلي..

عامر كان يتقلب على المسند الضيق وهو حاس ان روحه بتطلع منه: ياربي غصب يعني...مااقدر اتقبلها ..مااحس بشي صوبها...انا بعد انسان قبل كل شي ..وهذي المشاعر مو بيدي..الله سبحانه يزرعها بقلب كل انسان...طيب انا وشذنبي مكتوب علي الشقا..والله حرام اعيش باقي حياتي مع وحده مااشوفها اكثر من اخت ..الله يسامحك يبا...الله يسامحك يمه ..
::::::::::::::::::::::::::::::
الساعه خمس ونص الفجر...

فيصل يحذف روحه على السرير بغرفة مها وهو تعبان حده مع ان الليله كانت ليلة سلوى وهذا اللي خلاها تشب ضو...

مها تنام بجنبه وهي حاسه بتعب مثله: مو قلتلك مالها معنى هالروحه بس انت اصريت

فيصل وهو يفتح نص عين: اهم شي تطمنت عليك وخذيتي علاج سنع ..لو تأخرت عليكي شوي كان ضعتي من ايدي ..

مها بعد تفكير طويل: ضعت من ايدك.....يعني شلون؟؟؟

مالقت مها لسؤالها اجابه لان الحبيب راح بسابع نومه..."نوم العوافي"

فجر: حمووووووووووود من قالك تشوف جوالي ترى فيه خصوصيات ماارضى احد يشوفها
محمد ولدعمة فجر(19سنه): وشفيها يعني اذا شفت جوال بنت خالي؟
فجر: مثل ماقلتلك خصوصيات ومااحب احد يشوفها..
محمد: بس والله خوووووش رقصه....من هالبنت الحلوه؟
فجر متفاجئه: وانت لحقت تشوفها؟
محمد: والله ملكة جمال....منو هذي؟
فجر: مالك خص..
محمد: افاا والله انا مالي خص ؟؟علميني منو؟
فجر: وحده من صديقاتي...
محمد: شسمها؟
فجر:اسمها سمر ارتحت اللحين...يالله عاد اقلب وجهك...
محمد: طيب هي معك بالمدرسه؟..
فجر: اكيد بالمدرسه...يعني منوين عرفتها؟
وطلعت فجر من عند محمد اللي تم يفكر بسمر وكيف يوصلها....وقرر انه يروحلها المدرسه ويشوفها

::::::::::::::::::::::::